WASIMAMIZI WA MIRADI WATAKIWA KUTIMIZA WAJIBU KWA KUFUATA MASHARTI YA MIKATABA ILI KUKAMILISHA MIRADI KWA WAKATI

Posted on: December 9th, 2025

Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni, leo Disemba 8, 2025 amefungua Mafunzo ya Usimamizi wa Mikataba ya Ujenzi wa miradi kwa Wasimamizi wa miradi yaliyofanyika katika ukumbi wa Shule ya Sekondari Msalala.

Akifungua mafunzo hayo Mkurugenzi amewataka Wasimamizi wa miradi wakiwemo Walimu Wakuu, Wakuu wa Shule pamoja na Waganga Wafawidhi kuhakikisha wanatekeleza wajibu wao kwa kufuata masharti ya mikataba, ili miradi inayotekelezwa na Serikali iwe na tija na kukamilika kwa wakati.

Amesema ni muhimu kufanya hafla maalum za utiaji saini mikataba zitakazowakutanisha Mafundi, Wasimamizi wa miradi pamoja na wadau wengine wa Maendeleo ili kuhakikisha mikataba hiyo inahuishwa na kueleweka kwa pande zote mbili kabla ya utekelezaji kuanza.

Aidha, amesisitiza umuhimu wa kusimamia Mpango kazi kama ulivyoainishwa kwenye mikataba na kufanya ukaguzi wa mara kwa mara katika maeneo ya miradi ili kuepusha ucheleweshaji na matumizi yasiyo sahihi ya fedha za Serikali.

Kwa upande wake, Afisa Ugavi na Manunuzi (W) Ndg. Deonatus Mtani, amewataka Wasimamizi wa miradi kuzingatia taratibu za manunuzi, kufanya tathmini sahihi ya vifaa vinavyohitajika pamoja na kuhakikisha thamani ya fedha inaonekana moja kwa moja kwenye ujenzi wa miradi husika.

Kwa niaba ya Kaimu Mkuu wa kitengo cha Huduma za Sheria (W), Wakili Amabakise Oseah, amewataka Wasimamizi wa miradi kuwasilisha mikataba yote kwenye Ofisi ya Mwanasheria ili ifanyiwe upekuzi wa kisheria kabla ya kutekelezwa.

Amesema hatua hiyo itasaidia kubaini mapungufu, kuepuka migogoro ya kisheria na kulinda maslahi ya Serikali na wananchi.

Mafunzo hayo yanatarajiwa kuimarisha uwezo wa Wasimamizi wa miradi katika usimamizi wa rasilimali za umma na kuongeza ufanisi katika utekelezaji wa miradi ya maendeleo katika Halmashauri ya Wilaya ya Nyang’hwale