WASIMAMIZI WA MIKOPO NGAZI YA KATA WATAKIWA KUUNDA VIKUNDI VYENYE TIJA

Posted on: October 24th, 2024

Mkurugenzi Mtendaji wa Halmashauri ya Wilaya ya Nyang’hwale Ndg. Husna Toni leo Oktoba 24, 2024 amefungua Mafunzo ya Wasimamizi wa mikopo ya Vikundi vya Wanawake, Vijana na Watu wenye Ulemavu ngazi ya Kata yaliofanyika katika ukumbi wa Halmshauri.

Awali Mkurugenzi Mtendaji amewapongeza Wasimamizi wa Mikopo kwa kupewa mafunzo hayo, na kuwataka kutoa elimu ya kutosha kwa Wananchi kuhusu maboresho yaliyofanywa na Serikali juu yanutaratibu wa utoaji wa mikopo hiyo.

Aidha amewataka Maafisa wa maendeleo ya Jamii kuhakikisha hakuna uundwaji wa vikundi hewa na badala yake wanatakiwa kuwa waaminifu kwenye kusimamia vikundi hivyo.

Halikadhalika Mkuu wa Idara ya Maendeleo ya Jamii Ndg. Majagi Maiga amewaeleza Wasimamizi hao Sheria na Kanuni zilizoboreshwa za utoaji Mikopo ambazo zinatakiwa kuzingatiwa kwenye utoaji wa Mikopo hiyo.

Vilevile  Mratibu wa mikopo ya asilimia 10 Mkoa, Ndg. Last Mwakasendile ametoa elimu ya Mwongozo wa Utendaji, Utoaji na Usimamizi wa Mikopo ya vikundi katika mamlaka ya Serikali za Mitaa ya Mwaka 2024, ambapo amesema lazima kuwe na usimamizi mzuri wa kukusanya marejesho.

Mratibu wa Mikopo Mkoa

Sanjari na hayo Hakimu Mfawidhi (W) Mhe. Idran D. Chuvaka amewaapisha Wasimamizi wa Mikopo ngazi ya Kata kiapo cha kutogongana kimaslahi kwenye mikopo ya 10% ya Halmashauri ya Nyang’hwale

Pamoja na mambo mengine, Mratibu wa mikopo ngazi ya Halmashauri Ndg. Yahya Selemani ametoa elimu kuhusu mwongozo wa Wanufaika wa mikopo ambao  umeainisha namna ya kuunda Vikundi, Ujasiriamali, Utatuzi wa Migororo, Andiko la Mradi na namna ya kuomba Mkopo.

Wasimamizi  wa  Mikopo  wakiapa