Wasichana 2523 kupata Chanjo ya Saratani ya Mlango wa kizazi Wilayani Nyang'hwale

Posted on: April 27th, 2018

Wilaya ya Nyang’hwale inatarajia kuwafikia Watoto takribani 2523 na kuwapa Chanjo ya Saratani ya Mlango wa Kizazi ikiwa ni kuhakikisha tunawakinga Watoto wa Kike dhidi ya Ugonjwa huu hatari.

Mheshimiwa Mkuu wa Wilaya ya Nyang’hwale Ndugu Hamimu Gwiyama ameeleza hayo siku ya Jumatano wiki hii wakati wa Uzinduzi wa Chanjo ya kuzuia Saratani ya Mlango wa Kizazi (HPV VACCINE) nchini kwa wasichana wenye umri wa miaka Kumi na Nne (14) na Maadhimisho ya wiki ya Chanjo.

Aidha kutokana na Mafunzo yaliyoambatana na Uzinduzi huo, aliwataka viongozi wa dini kwenda kuwaeleza ukweli wananchi juu ya umuhimu wa Chanjo hiyo ili kuwatoa hofu ya aina yoyote ya tafsiri tofauti zilizopo kwenye Jamii zetu.

Mhe, Gwiyama aliwasihi wataalamu wanaotoa Chanjo hiyo kuhakikisha wanakua waadilifu na kwenye zoezi hilo ili kutoa Chanjo yenye viwango vinavyotakiwa. “Wataalamu mnaokwenda kutoa Chanjo hii nawakumbusha kuwa kuna Viwango vya dawa kwa kila mtoto anayepatiwa Chanjo hii hivyo nawasihi nendeni mkawe waadilifu huko ili kufanikisha adhma ya Serikali.”  

Vilevile, alisisitiza kuongeza Uhamasidhaji kwa Jamii ili wananchi waelewe umuhimu wa Chanjo hiyo na kutoa Chanjo kwa asilimia mia moja (100&) tuliokusudia.

Awali wakati anatoa salamu za Ufunguzi, Kaimu Mganga Mkuu wa Wilaya Dkt. Phinias Ndalo alieleza kuwa Chanjo hiyo hutolewa kwa Wasichana wenye umri wa miaka 14 ikiwa ni baada ya Utafiti kuonesha Msichana anayejihusisha na Ngono katika umri mdogo ndio anakua hatarini zaidi kuambukizwa Ugonjwa wa Saratani ya Mlango wa Kizazi uenezwao na Virusi aina ya Human Papilloma.

Aidha, Mratibu wa Chanjo Ndugu Elias Martin alifafanua kuwa dalili za Mtu aliyeambukizwa Saratani ya Mlango wa Kizazi kuwa ni Kutokwa na Uchafu Ukeni, mabadiliko ya Hedhi na Maumivu ya Mgongo au kiuno. Aliongeza kuwa Saratani ya Mlango wa Kizazi husababishwa na Kujamiiana katika Umri mdogo, kuvuta sigara, Ndoa za Mitara, Kuzaa Watoto wengi na kuwa na wapenzi wengi.