WANAWAKE WAHIMIZWA KUZINGATIA UMUHIMU WA UNYONYESHAJI WA MAZIWA YA MAMA.

Posted on: August 8th, 2024

Kwa niaba ya Mkuu wa Wilaya ya Nyang’hwale, Afisa Tawala, Ndg. Vitalis Ndunguru amewahimiza Wanawake kuzingatia umuhimu wa unyonyeshaji wa mazwa ya mama ili kuwa na jamii yenye Afya bora kimwili na kiakili.

Hayo yameelezwa jana Agosti 07, 2024 kwenye Kilele cha maadhimisho ya Wiki ya Unyonyeshaji wa maziwa ya Mama Duniani yaliyofanyika Kiwilaya Kijiji cha Nyijundu Kata ya Nyijundu.

Amesema kuwa iwapo watoto watanyonyeshwa ipasavyo maziwa ya mama, vifo vitapungua kwa kiwango cha asilimia 13 ambacho ni kiwango kikubwa kuliko afua zote za kupunguza vifo vya Watoto.

“Wizara ya Afya inapendekeza Watoto wanyonyeshwe maziwa ya mama pekee katika kipindi cha miezi 6 ya mwanzo bila kuwapa kitu chochote kama vile maji, juisi, chai, mchuzi na vyakula vingine vyovyote” Ameongeza

Aidha, ameitahadharisha jamii kuachana na mila na desturi zinazomfanya Mwanamke kushindwa kunyonyesha Watoto wao kwa kipindi cha miezi 6 bila kumpa chakula kingine chochote.

Mkurugenzi Mtendaji wa Halmshauri ya Wilaya ya Nyang’hwale, Ndg. Husna Toni amesema kuwa unyonyeshaji watoto una faida nyingi ikiwa ni pamoja na kumjenga Mtoto kimwili na kiakili.

Kilele cha maadhmisho hayo kimeenda sambamba na shughuli mbalimbali za upimaji wa afya, uchangiaji wa damu, bonanza la mchezo wa mpira wa miguu, na tathmini ya upimaji wa hali ya lishe kwa Watoto.

Maadhimisho ya Wiki ya Unyonyeshaji wa Maziwa ya Mama Duniani 2024 yamechagizwa na kauli mbiu isemayo “Tatua Changamoto Kufanikisha Unyonyeshaji”.