WANANCHI WATAKIWA KUIUNGA MKONO SERIKALI KWENYE MIRADI YA MAENDELEO

Posted on: August 26th, 2024

Mkuu wa Wilaya ya Nyang’hwale Mhe. Grace Kingalame leo Agosti 26, 2024 amewataka Wananchi Wilayani Nyang’hwale kuunga mkono juhudi za Serikali kwenye ujenzi wa miradi mbalimbali ya maendeleo.

Ameyasema hayo alipofanya ziara ya kukagua miradi ya maendeleo na kufanya mikutano ya hadhara ya kusikiliza na kutatua kero za Wananchi wa Kata ya Nyijundu na Kata ya Kharumwa.

Akiwa kwenye mradi wa ujenzi wa matundu ya vyoo 16 Shule ya Msingi Nyarubele ambao umekamilika kwa asilimia 98, amewapongeza Wananchi wa Kijiji hicho kwa ushirikiano wao uliofanikisha ujenzi huo.

Aidha amewataka Wananchi hao kuunga mkono juhudi za Serikali ya awamu ya sita kwa kuhakikisha wanawapeleka Watoto kupata elimu kwa sababu mazingira ya kutolea elimu yameboreshwa kwa kiasi kikubwa ukilinganisha na hapo awali.

Aidha, alipokua kwenye Mkutano wa hadhara Kata ya Kharumwa, amesisitiza umuhimu wa Wananchi kushiriki kwenye ujenzi wa miradi ya maendeleo inayoendelea kutekelezwa kwenye maeneo mbalimbali ya Kata hiyo.

“Mhe. Dkt. Samia Suluhu Hassan, Rais wa Jamhuri ya Muungano wa Tanzania ameleta fedha nyingi za ujenzi wa miundombinu ya kutolea huduma ya Elimu na Afya kwenye Wilaya yetu, kwa mwaka wa fedha ulioisha Juni 2024 pekee tumepokea zaidi ya Bilioni 7” Amesema Mhe. Kingalame

Pamoja na mambo mengine, amewataka Wananchi kushiriki kikamilifu kwenye zoezi la Uchaguzi wa Serikali za Mitaa kwa kuhakikisha Wanachagua viongozi bora wenye kujali maslahi ya Wananchi.