WANANCHI WANUFAIKA NA UTEKELEZAJI WA SHUGHULI ZA LISHE

Posted on: April 24th, 2025

Mwenyekiti wa Kamati ya Lishe Wilaya ambae pia ni Kaimu Mkurugenzi wa Halmashauri ya Wilaya ya Nyang’hwale Ndg, Ezekiel Ntiriyo, leo Aprili 24,2025, amepokea taarifa ya utekelezaji wa shughuli za lishe kwa Kipindi cha robo ya tatu kuanzia Januari hadi Machi 2025.

Afisa Lishe (W) Ndg, Furaha Nicholaus, amesema zimefanyika shughuli mbalimbali ikiwemo kutoa mafunzo kwa wahudumu wa afya ngazi ya jamii ambapo jumla ya wahudumu 62 wamepatiwa mafunzo ya lishe bora. Kati ya hao, 19 wanawake na 43 wanaume, lengo ikiwa ni kuwajengea uwezo katika kutekeleza shughuli zinazohusiana na masuala ya lishe.

Pia, elimu imetolewa kwa watu wanaonufaika na Mpango wa TASAF ambapo jumla ya wanufaika 76 kutoka Kijiji cha Busengwa wamepatiwa elimu juu ya ulaji unaofaa, Elimu ya unyonyeshaji kwa watu wanaoishi na maambukizi ya VVU, na Kuzingatia mlo kamili wenye makundi sita ya chakula ili kuimarisha kinga za Mwili na Afya zao.

Halikadhalika, Jumla ya Wananchi 223 wa Kijiji cha Ibambila kupitia Mkutano wa hadhara wamepatiwa elimu ya namna ya kuzigatia lishe bora kwa watu wenye magonjwa ya kuambukizwa, na namna sahihi ya kujikinga na magonjwa yasiyoambukizwa.

Kaimu Mkurugenzi Ndg. Ntiriyo amekielekeza kitengo cha Lishe kiongeze juhudi katika kuunda Klabu za lishe Shuleni ambapo kupitia klabu hizo Wanafunzi watajengewa uwezo juu ya umuhimu wa kuzingatia lishe bora.

Pamoja na mambo mengine amemuelekeza Afisa Lishe kutoa elimu kwa Watumishi hasa wanapokutana katika matukio yanayowaunganisha pamoja kama vile Mabonanza, Sherehe za Mei Mosi na maadhimisho mengine ikiwa lengo ni kujikinga na Magonjwa yasiyoambukizwa.