WANANCHI WAFURAHISHWA NA ZOEZI LA UPIMAJI SHIRIKISHI WA MAKAZI YAO

Posted on: July 6th, 2023

Wananchi wa Kijiji cha Nyijundu kilichopo Kata ya Nyijundu katika Halmashauri ya Wilaya ya Nyang’hwale, jana Julai 5 wameelezea kufurahishwa kuanza kwa hatua za awali za upimaji shirikishi wa makazi yao katika Kijiji hiko.

Akizungumza kwa niaba ya Mkurugenzi wa Halmashauri ya Wilaya ya Nyang’hwale, Bw. Majagi Robin Maiga alieleza kuwa Kijiji cha Nyijundu ni miongoni mwa maeneo yanayokua kwa kasi katika Wilaya ya Nyang’hwale.

“Zoezi hili la upimaji na urasimishaji wa makazi yetu ni shirikishi na muhimu sana kwa kuwa litasaidia kwa kiasi kikubwa kutatua changamoto ya migogoro ya ardhi katika maeneo yetu” Aliongeza Bw. Majagi

Afisa Ardhi wa Wilaya ya Nyang’hwale, Bw. Goodluck Masatu,  aliwaeleza wananchi wa Kijiji hiko cha Nyijundu hatua muhimu za kufatwa katika utekelezaji wa zoezi hilo. Ambapo, ni pamoja na Kuyatambua maeneo hayo, kuyapanga, kuyapima, na kuyamilikisha kwa Wananchi na Taasisi.

Aidha, Bw. Masatu alisimamia zoezi la upatiakanaji wa kamati ya upimaji itakayoshirikiana na wataalamu kutoka Ofisi ya Mkurugenzi wa Halmashauri kama sheria inavyoelekeza, ili katika kuratibu zoezi zima la upimaji kijijini hapo.

Kamati hiyo ya Kijiji yenye watu tisa, imejumuisha Afisa Mtendaji wa Kata, Mwenyekiti wa Kijiji, wajumbe wawili kutoka Halmashauri ya Kijiji na wajumbe watano kutoka kila kitongoji watakaowakilisha wananchi wa Kijiji hiko.

“Upimaji na Urasimishaji wa makazi haya utawaboreshea ustawi wa Maisha yenu kwa kuwaletea faida mbalimbali kama, kukopesheka katika taasisi za fedha, kupandisha thamani ya ardhi yenu, na kumiliki ardhi yenye ulinzi wa kisheria”. Alisisitiza Bw. Masatu