WAHAMASISHENI WANANCHI KUSHIRIKI UCHAGUZI WA SERIKALI ZA MITAA – MKURUGENZI MTENDAJI, NYANG’HWALE.

Posted on: September 4th, 2024

Mkurugenzi Mtendaji wa Halmashauri ya Wilaya ya Nyang’hwale Ndg. Husna Toni amewasisitiza Watendaji wa Kata kuwahamasisha Wananchi kujitokeza kushiriki uchaguzi wa Serikali za Mitaa unaotarajiwa kufanyika Novemba 27, 2024.

Ameyasema hayo leo Septemba 04, 2024 katika kikao kazi maalum kilichofanyika katika ukumbi wa mikutano wa Halmashauri kilichohudhuriwa na Watendaji wa kata zote 15 za Halmashauri ya Wilaya ya Nyang’hwale.

Mkurugenzi Mtendaji ameelekeza  kuwa hamasa itolewe kwa kuzingatia makundi ya Jamii kama vile Vijana, Wazee, na watu wenye ulemavu. Aidha, amesema kuwa makundi hayo yanaweza kufikiwa kupitia nyumba za ibada, Michezo na matamasha ya ngoma za asili.

“Kupitia mikutano yenu ya ngazi ya vitongoji na Vijiji, miongoni mwa ajenda mtakazozijadili, swala la uchaguzi mlipe kipaumbele ili kuwajengea uelewa Wananchi juu ya ushiriki wao kwenye Uchaguzi wa Serikali za Mitaa” Amesisitiza Mkurugenzi.

Kwa upande wao Watendaji wa Kata wamemshukuru Mkurugenzi Mtendaji kwa kufanya nao kikao kazi hicho maalum chenye madhumuni ya kuwakumbusha wajibu wao kuelekea Uchaguzi wa Serikali za Mitaa.