WAGONJWA ZAIDI YA 270 WAMENUFAIKA NA UJIO WA MADAKTARI BINGWA WA MAMA SAMIA

Posted on: June 28th, 2024

Kambi ya Madaktari Bingwa wa Mama Samia Wilayani Nyang’hwale imewanufaisha wagonjwa zaidi ya 270 wenye magonjwa mbalimbali kwa muda wa siku tano tangu walipowasili hapo Juni 24, 2024.

Hayo yameelezwa leo na Kiongozi wa timu ya madaktari hao ambae pia ni Daktari Bingwa wa magonjwa ya Watoto, Dkt. Mariam Gaitani. Aidha, ameambatana na Daktari Bingwa wa Wanawake,  Daktari Bingwa wa magonjwa ya ndani, Daktari Bingwa wa upasuaji na Daktari Bingwa wa usingizi na ganzi salama.

Dkt. Mariam amesema kuwa lengo la kampeni hii ni kuhakikisha huduma bora zinawafikia Wananchi katika maeneo yao ili kuwapunguzia gharama ya kusafiri umbali mrefu kufata huduma hizo.

“Tangu tumefika hapa Jumatatu tumefanikiwa kuwaona wagonjwa zaidi ya 270, kwa hiyo muitikio wa Wananchi ni mkubwa na Wananchi wenye kuhitaji huduma kama hizi ni wengi. Hivyo, kutokana na uwepo wetu hapa, wagonjwa wamefanikiwa kupata walichokihitaji” Dkt. Mariam

Pamoja na Wananchi kunufaika moja kwa moja na ujio wa madaktari hao, Watoa huduma pia wa Hospitali ya Wilaya ya Nyang’hwale wamenufaika kupata ujuzi kwa vitendo kutoka kwa madaktari hao.

“Kuna watoa huduma zaidi ya thelathini ambao sisi tumeweza kuwaelekeza mambo mengi ambayo baada ya sisi kuondoka wataweza kuendelea kuwahudumia Wananchi kwa kutumia Utaalamu ambao wameupata kutoka kwetu” Amesema Dkt. Mariam

Mkurugenzi Mtendaji wa Halmashauri ya Wilaya ya Nyang’hwale, Ndugu, Husna Toni amewashukuru sana Madaktari Bingwa kwa kutoa huduma kwa Wananchi kwa kipindi chote cha siku tano katika Hospitali ya Wilaya ya Nyang’hwale.

Kwa kumalizia amemshukuru pia Mhe. Rais. Dkt. Samia Suluhu Hassan kwa kuwezesha ujio wa madaktari hao Wilayani Nyang’hwale, kwani umekua na faida kubwa kwa Wananchi na Watoa huduma wa Hospitali ya Wilaya kwa kuongeza ujuzi kwa vitendo.

Kambi ya Madaktari Bingwa ilikua ya siku tano, kuanzia Juni 24, 2024 na imemalizika leo Juni 28, 2024.