WAFUGAJI WATAKIWA KUCHANJA MIFUGO YAO DHIDI YA UGONJWA WA HOMA YA MAPAFU

Posted on: September 16th, 2025

Katibu Tawala wa Wilaya ya Nyang’hwale Ndg kaunga Amani, leo Septemba 16, 2025, amezindua zoezi la chanjo dhidi ya Ugonjwa wa Mapafu ya Ng’ombe ijulikanayo kwa jina Contagious Bovine Pleuropneumonia (CBPP) na Uvikaji Hereni kwa ajili ya Utambuzi wa Ng’ombe katika kata ya Nyabulanda Kijiji cha Nyashilanga .

(Katibu Tawala wa Wilaya ya Nyang'hwale Ndg, Kaunga Amani akiwataka wafugaji kuchanja mifugo yao ili kuvutia soko la kimataifa)

Akizungumza na Wafugaji Ndg, Kaunga amewataka wafugaji kujitokeza kuchanja Mifugo yao ili kudhibiti vifo vya ghafla kwa mifugo dhidi ya ugonjwa wa mapafu ya ng’ombe sambamba na uvikaji wa hereni ambazo zitasaidia kutoa taarifa za mmiliki wa ng’ombe.

Katibu Tawala amesema Serikali ya Awamu ya Sita kupitia Wizara ya Mifugo na Uvuvi imetoa jumla ya dozi 1,700 ambazo zitachanja ng’ombe 170,000 zitakazomuwezesha mfugaji kulipa gharama ya Tsh. 500 tu, badala ya Tsh. 1,000 kwa kila ng’ombe.

(Afisa Mifugo akivalisha hereni ng'ombe kwa ajili ya utambuzi wa mifugo)

“Mifugo iliyochanjwa ni salama kwa matumizi ya kitoweo na itaweza kununuliwa na wafanyabiashara kutoka nchi za nje na kumnufaisha mfungaji, huku nchi ikipata fedha za kigeni” Amesema

Aidha, amekabidhi Vishikwambi 20 Kutoka Wizara ya Mifugo na Uvuvi kwa Maafisa Mifugo ngazi ya Kata kwa ajili ya kuhifadhi taarifa za wafugaji ikiwa ni Idadi ya Mifugo anayomiliki mfugaji na mashamba ya kulisha mifugo yake.

Kaimu Mkurugenzi wa Halmashauri ya Wilaya ya Nyang’hwale Ndg. Ezekiel Ntiriyo amesema wafugaji wanatakiwa kushirikiana na wataalamu wa mifugo ili kuhakikisha zoezi hilo linafanikiwa kikamilifu na kuondoa imani potofu juu ya zoezi zima la uchanjaji.

(Katibu Tawala Wilaya ya Nyang'hwale Ndg, Amani Kaung akiwa katika picha ya Maafisa Mifugo)

Kwa upande wake mfugaji Ndg. Hamis Shija ameishukuru Serikali kwa jitihada inazozifanya katika sekta ya Ufugaji na amewahimiza wafugaji wengine watoe ushirikiano kikamilifu kwa wataalamu ili zoezi liweze kufanikiwa.