WAFUGAJI WAHIMIZWA KUTUMIA MBINU ZA UFUGAJI BORA

Posted on: July 11th, 2024

Na. Afisa Habari – Nyang’hwale DC

Afisa Tawala wa Wilaya ya Nyang’hwale Ndugu, Vitalis Ndunguru, kwa niaba ya Mkuu wa Wilaya ya Nyang’hwale amewahimiza Wafugaji Wilayani Nyang’hwale kutumia mbinu bora na za kisasa za Ufugaji.

Ameyasema hayo leo Julai 11, 2024 Kijiji cha Kayenze Kata ya Kafita mara baada ya kukabidhi Lita 18 za dawa aina ya Rolldip ya kuoshea mifugo.

“Wafugaji mjitahidi kufuga kisasa kwa kufuata maelekezo ya maafisa mifugo wetu ikiwa ni pamoja na kuogesha mifugo yenu mara kwa mara kadri mnavyoelekezwa na Wataalamu wetu wa mifugo” Amesema Ndugu, Ndunguru

Amewaeleza kuwa ili Mfugaji aweze kuona tija ya ufugaji wake basi hana budi kutumia mbinu za kisasa za ufugaji bora. Ameongeza kuwa mazao bora ya mifugo kama vile nyama, ngozi maziwa na mengineyo yanatokana na ufugaji ulio bora.

Aidha, Ndugu, David Mabula ambae ni Afisa Kilimo (W) amesema Serikali kupitia Wizara ya Mifugo na Uvuvi imejipanga kutatua changamoto zinazowakabili Wafuagaji ikiwa ni pamoja na kuwapatia dawa za majosho zinatakazosaidia  kupambana magonjwa yanayosumbua mifugo.

Afisa Mifugo (W), Ndugu, Marwa Jackson ameeleza kuwa Dawa aina ya Rolldip itasaidia kuzuia magonjwa ya kupe yanayoenezwa na vimelea vya Protozoa. Magonjwa hayo ni kama vile Ndigana Kali (East Coast Fever), Ndigana Baridi (Anaplasmosis), Maji Moyo (Heart Water), na Mkojo Mwekundu (Babesiosis).

Kwa upande wa wafugaji wa Kijiji cha Kayenze wamemshukuru sana Mhe. Rais, Dkt. Samia Suluhu Hassan kupitia wasaidizi wake kwa kuwapatia dawa hizo bila gharama yoyote kwani zitasaidia kupambana na magonjwa yanayosumbua Mifugo yao.