Wafanyakazi waonywa kujihusisha na vitendo vya Rushwa

Posted on: May 1st, 2019

Mkuu wa Moa wa Geita Mhe. Robert Gabriel amewataka Wafanyakazi Mkoani Geita kutojihusiha na vitendo vya Rushwa kwenye utekelezaji wa Miradi ya Maendeleo kwani inapelekea upotevu wa Fedha za Serikali.

Amesema hayo kwenye Viwanja vya Shule ya Sekondari Chato alipokua akiwahutubia Wafanyakazi wakati wa maadhimisho ya Siku ya Wafanyakazi Duniani yalipoadhimishwa Kimkoa.  “Ubora wa Miradi unapungua panapotokea Rushwa” alisema Mkuu wa Moa.

Aidha amewataka Wafanyakazi kufanya kazi kwa bidii na maarifa na nidhamu huku wakifuata miiko ya kazi zao ili kuwaletea wananchi maendeleo. “Nidhamu, heshima na kujituma iwe kipaumbele cha kwanza kwenye Mkoa wetu” alisema Mkuu wa Mkoa.

Kutia mimba Wanafunzi na kuwatumikisha Watoto ni Miongoni mwa mambo aliyokemea na ndipo akaagiza Viongozi wote kuanzia ngazi ya Vitongoji kutofumbia macho wahalifu wa aina hiyo na wataobainika wachukuliwe hatua za kisheria ili kukomesha tabia hizo chafu Mkoani Geita. “Haki ya Mtoto ni Elimu, nawasihi viongozi kwenye maeneo yote muhakikishe mnakomesha ajira kwa Watoto”

Mhe Robert amewaahidi Wafanyakazi kuwa Changamoto zote zinazowakabili Wafanyakazi zitatatuliwa na Serikali kwani ni sikivu na amewataka pia kutatua wenyewe zile zilizo kwenye uwezo wao kiutendaji.

Aliwasihi wanaoishi na maambukizi ya Virusi vya UKIMWI Kuhudhuria kwenye vituo vya kutolea Huduma za Afya ili waweze kuoata dawa za kufubaza makali na kwa wale ambao hawajajitambua basi wafike hospitali wapime afya zao ili waweze kujitambua na kuishi vizuri.

Awali Mwenyekiti wa Vyama vya Wafanyakazi Mkoa (TUCTA) mkoa wa Geita, Ndugu Ramadhani Pangala alibainisha changamoto za Wafanyakazi Mkoani Geita kuwa ni pamoja na baadhi ya waajiri kutoa mikataba ya Muda mfupi sana wa kazi,Mfuko wa Mafao wa psssf kushindwa kutoa Mafao kwa Wafanyakazi waliokuwa PSPF, wanasiasa kuingilia shughuli za Kitaalamu na kuleta hasara Serikalini,Uhaba wa Watumishi, Wafanyakazi Kuondolewa kwenye Utumishi bila Barua, kutokuwepo kwa huduma za OSHA NA WCF, na kutopewa zawadi kwa Wafanyakazi Hodari.

Bwana Pangala risala yake ilisheheni changamoto za Wafanyakazi akizitaja zingine kuwa ni  malimbikizo ya madeni kwa Watumishi, mishahara midogo, kuchelewa kupandisha vyeo, Madaraja na mishahara, Wafanyakazi wanaopandishwa Madaraja kutolipwa kwa wakati, na baadhi ya wafanyakazi wa Migodini kulipwa mishahara kupitia Serikali za Mtaa.

Kutokana na changamoto hizo alishauri Serikali kuwahamishia Watumishi wote wanalipwa mshahara kupitia Mapato ya Ndani kuwahamishia Hazina pamoja na aliomba Serikali kulipa stahiki za likizo kupitia Hazina na sio waajiri. Aidha hakusita kuipongeza Serikali kwenye uamuzi wake wa kuendelea na kikokotoo cha awali cha Mafao na sio kipya cha psssf kinachokandamiza wastaafu.

Madhehebu ya Dini, Vyombo vya Ulinzi na Usalama, Taasisi binafsi na za Serikali kutoka wilaya zote za mkoa wa Geita  wameshiriki Maadhimisho ya Mei Mosi 2019.