WADAU WATOA USHAURI UHAMASISHAJI WA UBORESHAJI WA DAFTARI LA KUDUMU LA WAPIGA KURA

Posted on: July 29th, 2024

WADAU WATOA USHAURI UHAMASISHAJI WA UBORESHAJI WA DAFTARI LA KUDUMU LA WAPIGA KURA

Afisa Mwandikishaji wa Jimbo la Nyang’hwale Ndg. Husna Toni leo Julai 29, 2024 amekutana na kuzungumza na Wadau wa Uchaguzi juu ya uhamasishaji kuelekea zoezi la Uboreshaji wa daftari la kudumu la Wapiga Kura.

Amesema kuwa kwa Mkoa wa Geita zoezi la Uboreshaji wa Daftari la Kudumu la Wapiga Kura litafanyika kwa siku saba kuanzia Agosti 05, 2024 hadi Agosti 11, 2024.

Amesema kuwa Jimbo la Nyang'hwale lina jumla ya Idadi ya Vituo vya kujiandikishia 201, ambapo kati ya hivyo 62 ni vya wazi na 139 vipo kwenye majengo. Vituo hivyo vitafunguliwa kuanzia Saa 2:00 Asubuhi na kufungwa Saa 12:00 Jioni.

Katika kila Kituo cha kujiandikishia kutakua na Watendaji wawili, yaani Mwandishi Msaidizi na Mwendeshaji wa Kifaa cha Bayometriki. Ameongeza kuwa kutakuwa na Watendaji 62 wa akiba Wilaya nzima.

“Katika kituo kutakuwa na wakala mmoja wa kila Chama cha Siasa na kutakuwa na mabango yatakayoelekeza vituo vilipo ili iwe rahisi kwa Mwananchi kufika na kujiandikisha” Amesema Ndg. Husna Toni

“Wanaotarajiwa kuandikishwa ni pamoja na waliofika umri wa miaka 18 au zaidi, watakaofika umri wa miaka 18 kabla au wakati wa uchaguzi, waliohamia, waliopoteza kadi au kadi zilizoharibika, na wanaofanya marekebisho ya taarifa zao” Amefafanua

Kauli mbiu ya Zoezi la Undikishaji 2024 inasema “Kujiandikisha Kuwa Mpiga Kura Ni Msingi Wa Msingi Wa Uchaguzi Bora”