WADAU WATOA MAONI DIRA YA MAENDELEO YA TAIFA 2050

Posted on: July 20th, 2023

Mkuu wa Wilaya ya Nyang’hwale, Mhe. Grace Kingalame akiwa sambamba na Kamati ya Ulinzi na Usalama ya Wilaya leo Julai 20, ameongoza kikao cha kutoa maoni ya wadau mbalimbali kuhusu Dira ya Maendeleo ya Taifa 2050 katika Ukumbi wa Halmashauri ya Wilaya ya Nyang’hwale.

Kikao hiko kimehudhuriwa pia na Mkurugenzi Mtendaji wa Wilaya ya Nyang’hwale, Bi Husna Toni, Mhe. Mwenyekiti wa Halmashauri, John I. John, Waheshimiwa Madiwani, Viongozi mbalimbali wa Taasisi za Serikali na Mashirika ya Umma, Viongozi wa dini, wadau mbalimbali na wananchi kwa ujumla.

Wajumbe wa Sekretarieti ya Maandalizi ya Dira ya Taifa ya Maendeleo 2050 walianza kwa kutaka kupata uelewa wa Washiriki wa kikao hiko juu ya Dira ya Taifa ya Maendeleo. Wadau mbalimbali walichangia namna wanavyoelewa juu ya tafsiri ya Dira ya Taifa ya Maendeleo.

Mmoja wa washiriki wa kikao hiko alieleza kuwa Dira ya Taifa ya Maendeleo ni muongozo unaotoa taswira ya wapi nchi ilipotoka, ilipo hivi sasa na inakoelekea kwa siku zijazo. Hivyo basi ni Muhimu kwa Nchi kuwa na Dira ya Taifa.

Aidha, Washiriki waliainisha baadhi ya mafanikio yaliyofikiwa katika Dira ya Taifa iliyopita ambayo ukomo wake utakua ifikapo 2025. Mafanikio hayo ni pamoja na kuendelea kuboreka kwa sekta ya Miundombinu, Elimu, Afya na Amani.

Sambamba na mafanikio hayo, pia kuna baadhi changamoto zilizoelezwa ambazo wadau wameshauri zifanyiwe kazi ili kuweza kufikia malengo ya Dira ya Maendeleo ijayo ya 2050. Baadhi ya changamoto hizo ni pamoja na Tatizo la ajira, Upungufu wa vifaa tiba kwenye vituo vyetu vya Afya, Zahanati, Hospitali, na mmomonyoko wa maadili.

Pamoja na mambo mengine washiriki walipata nafasi ya kuainisha namna ya kutatua changamoto zilizojitokeza kwenye Dira inayoishia 2025, na kushauri vipaumbele kwenye Dira ya Maendeleo ijayo ya 2050. Vipaumbele hivyo ni pamoja na Elimu, Afya, Nishati, Kilimo cha kisasa na kuimarisha miundombinu.

Hivyo, Wadau walimalizia kwa kushauri mikakati inayofaa kwa ajili ya Dira ya maendeleo ya 2050. Amabapo, mikakati hiyo ni pamoja na kuwa na teknolojia ya kisasa, kudhibiti upotevu wa rasilimali na Kutumia vizuri rasilimali zilizopo kukuza pato la Taifa ili kupunguza utegemezi.

Ili kutoa maoni yako popote ulipo kwa kutumia simu yako, Bofya *152*00# kisha “OK”, hapo utapokea utaratibu wa kutoa maoni yako kwa Dira ya Maendeleo 2050.