WABUNGE WA MKOA WA GEITA WAUNGURUMA WILAYANI NYANGHWALE

Posted on: August 13th, 2023

Wabunge wa majimbo ya mkoa wa Geita kupitia mkutano wa hadhara jana Agosti 13, 2023 wamezungumza na wananchi wa Kata ya Nyang’hwale, Wilaya ya Nyang’hwale mkoani Geita.

Wabunge hao ni Mhe. Hussein Nassor Amar Mbunge wa Nyang’hwale, Mhe. Bryson Magesa Mbunge wa Busanda, Mhe. Merdan Kalemani Mbunge wa Chato, Mhe. Constantine Kanyasu Mbunge wa Geita Mjini, Mhe. Nicodemas Maganga Mbunge wa Mbogwe, na Mhe. Doto Biteko Waziri wa Madini na Mbunge wa Bukombe.  

Mbunge wa Nyanghwale, Mhe. Nassor aliwaeleza wananchi hatua mbalimbali za mafanikio ya serikali katika kuwaletea maendeleo wanachi wa Nyang’hwale kupitia miradi mbalimbali inayoendelea kutekelezwa jimboni kwake.

“Kwa mwaka wa fedha 2022/2023 Jimbo la Nyang’hwale tumeweza kuingiziwa fedha zaidi ya Bilioni kumi na tano, milioni mia tano na kumi na nne, fedha ambazo zimetumika kwenye miradi mbalimbali ya maendeleo” amesema Mhe. Nassor.

Tunajua kwenye elimu kuna shida kubwa ya upungufu wa madarasa, madawati, na nyumba za walimu. Lakini tumeweza kupunguza kero hizo kwa mwaka huu wa fedha ulioisha 2022/2023 kwa kuelekeza Tshs. Bilioni 4.6 kwenye sekta ya elimu. Aliongeza Mhe. Kassu.

Mhe. Nassor aliendelea kusema kwa mwaka wa fedha 2022/2023 Tshs. Bilioni 1.4 ilitumika kwenye miundombinu ya afya, Tshs. Milioni 238.8 kwa ajili ya kukopesha vikundi vya vijana, akina mama na watu wenye ulemavu, na Tsh Miloni 74.8 za mfuko wa jimbo kwa ajili ya kuchochea maendeleo ya wananchi.

Nao wabunge wengine wote wamewapongeza wananchi wa Nyang’hwale kwa hatua ya maendeleo waliyofikia hivi sasa ukilinganisha na hali ilivyokua hapo awali. Sambamba na hilo wamempongeza pia Mhe. Nassor kwa kuhakikisha anafanya kila juhudi kuwaletea maendeleo wananchi wake.

Mkuu wa Mkoa wa geita Mhe. Martine Shigela amewashukuru wananchi kwa kujitokeza kwa wingi na kuwapongeza wabunge wote wa mkoa wa Geita kwa kujidhatiti kuwaletea wananchi hao maendeleo katika sekta zote ikiwemo Afya, Elimu, Maji, Barabara na Nishati ya umeme.