VYAMA VYA SIASA VYATAKIWA KUZINGATIA SHERIA ZA NCHI

Posted on: October 23rd, 2024

Kuelekea Uchaguzi wa Serikali za Mitaa, Novemba 27, 2024, Ofisi ya Msajili wa vyama vya siasa imevitaka vyama vya siasa Wilaya ya Nyang’hwale kufanya shughuli zao kwa kuzingatia Sheria za Nchi zikiwemo Sheria za uchaguzi na Sheria zote zinazosimamiwa na Ofisi ya Msajili wa vyama vya siasa.

Hayo yameelezwa leo Oktoba 23, 2024 na Afisa Sheria kutoka Ofisi ya Msajili wa Vyama vya Siasa, Ndg. Dinna Mcharo alipokutana na viongozi wa vyama vya siasa wilaya ya Nyang’hwale katika ukumbi mdogo wa mikutano wa Halmashauri.

Ndg. Dinna amesema kuwa kipindi hiki cha maandalizi ya kuelekea Uchaguzi wa Serikali za Mitaa vyama vya siasa vina wajibu wa kuheshimu sheria zinazosimamia uchaguzi pamoja na kuzingatia kanuni za maadili ya vyama vya siasa na kanuni za kuratibu mikutano ya hadhara ya vyama vya siasa.

“Ni wajibu wa chama cha siasa kulaani, kuepuka na kuchukua hatua zinazofaa kwa mujibu wa sheria ili kuzuia au kuepusha vitendo vya vurugu, kutumia nguvu, matumizi ya lugha za matusi, uvunjifu wa amani na ukandamizaji wa aina yoyote” Amesema

“Kutotoa maneno au maandishi ya uongo dhidi ya mtu au chama kingine, Kujiepusha na vitendo vya rushwa na vitendo vya ubaguzi wa aina yoyote” Ameongeza

Pamoja na mambo mengine ameeeleza kuwa Chama cha siasa hakipaswi kunadi sera zinazopingana na Katiba ya Jamhuri ya Muungano wa Tanzania, katiba ya Zanzibar na Sheria nyengine za Nchi.

Mratibu wa Uchaguzi Mkoa wa Geita, Innocent Mabiki, amevishukuru vyama vya siasa kwa ushirikiano mkubwa unaoonyeshwa na vyama hivyo mpaka sasa, hasa katika zoezi la uandikishaji lililokamilika hivi karibuni.

Katibu Tawala Wilaya ya Nyang’hwale, Ndg. Kaunga Omari amewaasa viongozi wa vyama vya siasa kuzingatia Sheria za Nchi na kunadi sera safi zenye kujiepusha na vitendo vya ubaguzi wa aina yoyote na na uvunjifu wa amani.