VIONGOZI WA KIJIJI WATAKIWA KUFANYA KAZI KWA UADILIFU

Posted on: February 28th, 2025

Afisa Tawala wa Halmashauri ya Wilya ya Nyang’hwale Ndg. Jenes Katabalo, jana Februari 27, 2025 ameongoza mafunzo ya Viongozi katika ngazi ya Kijiji na Vitongoji kwa uongozi wa Halmashauri ya Kijiji cha Ikangala.

Akiwa katika mafunzo hayo, Afisa Tawala ameelezea uendeshaji wa shughuli za Serikali za Mitaa katika ngazi ya Kijiji na Kitongoji ambapo amewataka viongozi wa Halmashauri ya Kijiji kujua vizuri majukumu yao ili kufanya kazi kwa ufanisi na uadilifu.

Aidha, Afisa wa TAKUKURU Ndg. Gift Malima amewataka Viongozi wa Halmashauri ya Kijiji kufanya kazi kwa kufuata maadili ili kujiepusha na vitendo vya rushwa na amewataka viongozi kuheshimu sheria zote za Nchi ili kufanya maamuzi yaliyo sawa kwa watu wote.

Vilevile, Afisa Sheria, Wakili Zaujia Shemnga ameelezea namna Halmashauri ya Kijiji inavyotakiwa kutunga Sheria ndogondogo za Kijiji ambapo amesema Halmashauri ya Kijiji inavyotaka kutunga Sheria ni lazima kuhusisha Wananchi kushiriki katika kutunga Sheria hizo kwa kuita mkutano wa hadhara.

Halikadhalika, Afisa Ardhi Ndg. Julius Mboya ameelezea namna ya kufuta sheria kwenye uuzaji wa ardhi ili kuepusha migogoro ya Ardhi ambapo kila Ardhi inayotakiwa kuuzwa katika Kijiji ni lazima uongozi wa Halmashauri ya Kijiji uhusishwe kwenye uuzaji ili kudhibiti matumizi ya Ardhi.