VIJANA WAZITAMBUA FURSA ZA KIUCHUMI KUPITIA KONGAMANO LA VIJANA

Posted on: July 26th, 2025

Timu ya Wataalamu kutoka Ofisi ya Mkurugenzi Mtendaji wa Halmashauri ya Wilaya ya Nyang’hwale, jana Julai 25, 2025 imefanya Kongamano la vijana katika ukumbi wa “Kharumwa Sports” ikiwa ni sehemu ya maandalizi ya kuupokea Mwenge wa Uhuru kwa mwaka 2025.

Wataalamu wamezungumza na Vijana mambo mbalimbali yanayowahusu vijana ikiwa ni pamoja na Ushiriki wa vijana katika uchaguzi Mkuu wa Mwaka 2025, Historia na falsafa ya Mwenge wa Uhuru, namna ya kuzitambua fursa za uzalishaji mali, na stadi za maisha na matumizi sahihi ya fedha.

Vijana wakisikiliza mada mbalimbali kutoka kwa wawasilishaji

Mkuu wa Idara ya Kilimo, Mifugo na Uvuvi (W), Ndg, Mabula David amesema Vijana wanatakiwa kuthubutu kwa kuzikimbilia fursa za uzalishaji mali bila woga kama vile kilimo biashara, ufugaji na uchakataji wa mazao ya kilimo kwa kuwa fursa hizo zinapatikana kwenye mazingira wanayoishi.

Mkuu wa Idara ya Kilimo, Mifugo na Uvuvi Ndg. David Mabula, akizungumza na vijna juu ya fursa za kiuchumi zilizopo chini ya Idara hiyo

Afisa Kutoka kitengo ya Maliasili na uhifadhi wa Mazingira, Ndg, Mrema Juma, amesema kuwa, ni wakati sahihi kwa vijana kuzikimbilia fursa zinazotokana na mazao ya misitu kama vile uvunaji na ulinaji wa asali, na kuanzisha viwanda vidogo vya kuchakata mbao mazao ya misitu.

Aidha, Afisa Maendeleo ya Jamii, Ndg, Yahya Selemani amewaeleza Vijana kuwa wanatakiwa kutumia fursa ya uwepo wa kituo cha uwezeshaji wananchi kiuchumi na mikopo ya asilimia kumi inayotolewa na Halmashauri kujikwamua kiuchumi.

Afisa Maendeleo ya Jamii Ndg. Yahaya Selemani, akizungumza na vijna juu ya fursa za mikopo ya 10%

Pamoja na mambo mengine Vijana wametakiwa kushiriki kwenye mapokezi ya mbio za Mwenge wa Uhuru unaotarajiwa kuwasili Septemba 03, 2025 ukiwa na kauli mbiu isemayo “Jitokeze Kushiriki Uchaguzi Mkuu wa Mwaka 2025 kwa Amani na Utulivu"