VIJANA WATAKIWA KUWATUNZA NA KUWATHAMINI WAZEE

Posted on: October 2nd, 2024

Halmashauri ya Wilaya ya Nyang’hwale Jana Oktoba 1, 2024 imeadhimisha Siku ya Wazee duniani kwa kujumuika kwenye hafla ya pamoja na Wazee kutoka sehemu mbalimbali katika ukumbi wa Shule ya Sekondari Msalala.

Kwa niaba ya Mkuu wa Wilaya, Diwani wa Kata ya Kharumwa, Mhe. Leonard Mgema, amesema kuwa ni muhimu kuwathamini na kuwaenzi Wazee kwa kuwa ni hazina ya hekima, maarifa, na utamaduni wa Taifa.

Wazee wakiandamana kuelekea Ukumbi wa Mikutano wa shule ya sekondari Msalala.

Mhe. Mgema ametoa wito kwa jamii kuendelea kuwatunza wazee kwa kuwapa haki zao, kuwahudumia na kuwahakikishia usalama wao katika kipindi chote cha maisha yao.

Aidha Mhe.Mgema ameeleza kuwa Serikali inaendelea kuboresha mazingira ya Wazee kupata huduma bora za afya na kupewa kipaumbele pindi wanapokuwa kwenye maeneo ya kutolea huduma hizo ili kuwaondolea adha mbalimbali zinazoweza kujitokeza.

Mratibu wa Maadhimisho ya wazee Ndg Zaituni Kiboga  akiwasilisha ujumbe kwa Wazee

Halikadhalika, Mhe. Mgema amewakumbusha Wazee wajibu wao wa kuwalea vijana katika misingi ya Maadili na uadilifu kwa kuwakemea pale wanapokengeuka ili kuwa na jamii yenye na vijana wenye heshima na busara.

Maadhimisho hayo yametoa fursa kwa Wazee kushiriki shughuli mbalimbali ikiwa ni pamoja na maandamo, michezo na burudani za nyimbo,na mashindano ya michezo ya jadi.

Wanafunzi wakifanya maigizo katika kusherehesha Maadhimisho hayo

Kwa upande wake, Mwenyekiti wa Wazee Wilaya ya Nyang'hwale Mzee Eliasi Chasama amemshukuru Mwakilishi wa Mkuu wa Wilaya kwa kuona umuhimu wa kujumuika na  Wazee hao katika Siku hiyo muhimu.

Maadhimisho hayo ya Siku ya Wazee mwaka 2024 yamesindikizwa na kauli mbiu isemayo “Tuimarishe Huduma kwa Wazee, Wazeeke kwa Heshima”

Mwakilishi wa mkuu wa Wilaya na Diwani wa kata ya Kharumwa Mhe. Mgema akitoa zawadi kwa wanafunzi waliofanya maigizo