USAFI WA MAZINGIRA MIAKA 61 YA UHURU WA TANZANIA BARA - NYANG'HWALE

Posted on: December 7th, 2022

Katibu Tawala Wilaya ya Nyang'hwale Ndugu Fabian Yinza amewaongoza mamia ya wananchi wa Kata ya Kharumwa  wilayani humo kufanya usafi ikiwa ni zoezi maalumu wa kufanya usafi wa Mazingira Wilaya nzima kuelekea Maadhimisho ya Sherehe za Miaka  61 ya Uhuru wa Tanzania Bara. Haya yametokea  leo tarehe 07/12/2022 asubuhi baada ya kuhamsisha Wananchi wilaya nzima kufanya usafi maeneo yao ya biashara na majumbani.

Katika zoezi hili Katibu Tawala alipata nafasi ya Kuzungumza na Wananchi pamoja na wafanyabiashara wa soko la Kharumwa na kuwaeleza umuhimu wa kufanya usafi wa maeneo yao kila siku. Aliipongeza Halmashauri ya Wilaya ya Nyang’hwale inayoongozwa wa Mkurungenzi Mtedaji Bi Husna Toni kwa Kutenga kiasi cha milioni kumi za kujenga kizimba cha kuwekea Takataka ambacho kwa sasa kimeshaanza kutumika.

Aidha aliwaeleza wananchi kuwa pia Halmashauri yao ilitenga fedha za kununua Trekta la kuzolea takataka kutoka kwenye fedha za CSR ambalo liligharimu Kiasi cha Tshs Milioni 80. Aliwahasa wananchi kuweka takataka kwenye maeleo yaliyotenga ili Trekta hilo liweze kutumika vizuri kwani limegharamiwa kwa fedha zao.