TUUHIFADHI MSITU WA MIENZE KWA MAENDELEO ENDELEVU

Posted on: October 24th, 2023

Mkuu wa Wilaya ya Nyang’hwale, Mhe. Grace Kingalame, akiwa na Kamati ya Usalama (W), Kamati ya Siasa (W), na Ofisi ya Mkurugenzi Mtendaji (W) kwa pamoja wamefanya ziara ya siku 3 kutoa Elimu juu ya umuhimu wa kutunza hifadhi ya msitu wa Mienze.

Hifadhi ya Msitu wa Mienze ni miongoni mwa hifadhi za misitu kongwe iliyoanzishwa mwaka 1956 kwa GN namba 104, ukiwa na ukubwa wa hekta 8988, na kwa sasa linasimamiwa na Sheria ya Misitu namba 14, ya mwaka 2002.

Kutokana na ongezeko la wingi wa watu kadri miaka inavyosonga mbele,kumekua na uhitaji mkubwa wa ardhi kwa jamii zinazoizunguka  hifadhi ya msitu huo, ambapo imezalisha uvamizi wa kufanya shughuli za kibinadamu ndani ya hifadhi ya msitu huo.

Kwa kuliona hilo, Serikali iliunda timu ya mawaziri nane wa kisekta kutathmini uhalisia wa uhitaji wa ardhi kwa wananchi walio karibu na hifadhi ya msitu huo. Serikali kupitia kamati hiyo iliridhia kutoa hekari 1852 kwa kijiji cha Bujura Mienze na hekari 331 kwa Kijiji cha Ihushi, na maombi ya vijiji vingine yakiendelea kuchakatwa.

Kwa kutambua umuhimu wa uhifadhi ya Msitu huo  Viongozi wa Serikali na Chama kwa pamoja wametembelea vijiji vya Wavu, Shabaka, Bujura Mienze, na Nyakaswi kwa lengo la kuunganisha nguvu za pamoja katika kutoa elimu na uelewa mpana kwa jamii juu ya umuhimu  wa uhifadhi wa msitu huo.

Mhe. Kingalame amesema kuwa Wananchi wanapaswa kuheshimu mipaka ya hifadhi ya msitu kwa kuwa mipaka hiyo imewekwa kisheria. Pia, amewasihi wajitokeze kwa wingi kuomba sehemu ya ardhi ambayo imekwisharidhiwa na serikali kutumika kwa shughuli za kiuchumi na makazi.

Aidha, Afisa Maliasili na uhifadhi  wa Mazingira (W), Ndugu, Mrema Juma, amesema kuwa Msitu una faida nyingi ikiwa ni pamoja na kupata hali ya hewa nzuri, kupata mvua kwa misimu miwili kwa mwaka, kuwezesha shughuli za ufugaji wa nyuki na biashara ya hewa ya Ukaa.

Katibu Mwenezi CCM (W), Ndugu, Said Madoshi, amewatahadharisha wananchi hao, kutofanya shughuli za kilimo wala ufugaji katika hifadhi ya msitu huo, kwa kuwa kufanya hivyo ni kinyume na sheria. Amesisitiza pia waliovamia maeneo hayo watoke haraka bila ya kusubiri nguvu itumike kuwaondoa.

“Kabla hawajachukua hatua hawa watu wa ulinzi na usalama , tunataka tuwaeleze , msikie, na muelewe Watanzania wa Bujura Mienze. Tumekuja kuwaeleza ukweli kwamba tokeni msituni kwa kauli ya serikali, achieni maeneo hayo, ukikutwa huko msituni, ni wewe na serikali” Alisisitiza Ndugu Madoshi.

Kwa upande wake, Afisa Ardhi (W), Ndugu, Goodluck Massatu, amewasisitiza Wananchi hao kuongeza kasi ya kuchangamkia fursa ya kuomba kumilikishwa ardhi ambayo tayari Mhe. Rais ameridhia igawiwe kwa Wanachi hao.

“Serikali imetoa hekari 1852 kwa ajili ya matumizi ya Wananchi wa Kijiji cha Bujura Mienze. Wakati Serikali inatoa eneo lile, ilitoa na maelekezo ya kufanya mpango bora wa matumizi ya ardhi na kutoa hati miliki za kimila kwa kila Mwanakijiji wa Bujura Mienze” Amesema Ndugu Masatu

“Tulikubaliana kwenye mkutano wa hadhara maeneo haya, akiwepo Mwenyekiti wa Kijiji, wajumbe wa Halmashauri ya Kijiji, Diwani wa kata hii na Wananchi, kwamba kila atakayeomba hekari moja ya ardhi atalazimika kulipa shilingi 40,000/= kwenye akaunti ya Serikali ya Kijiji ili tuwape hati miliki ya kimila ambayo kisheria haina ukomo” Amesisitiza Ndugu Masatu