THAMANI YA FEDHA IONEKANE KWENYE UTEKELEZAJI WA MIRADI

Posted on: January 23rd, 2024

Hayo yameelezwa jana Januari 23, 2024 kufuatia ziara ya Kamati ya Siasa ya Wilaya ya Nyang’hwale ambayo imekagua miradi ya maendeleo  iliyopo katika hatua mbalimbali za utekelezaji. Ziara hiyo imeongozwa na Mwenyekiti wa CCM Wilaya ya Nyang’hwale, Ndugu, Adam Mtole.

Ziara hiyo pia imejumuisha viongozi mbalimbali wa Wilaya ikiwa ni pamoja na Mkuu wa Wilaya ya Nyang’hwale, Mhe. Grace Kingalame, Mwenyekiti wa Halmashauri, Mhe. John I. John, na Kaimu Mkurugenzi, Ndugu Majagi Maiga.

Aidha, miradi ambayo imetembelewa na kukaguliwa ni Ujenzi na ukamilishaji wa Zahanati ya Ng’wabuyi iliyopo Kijiji cha Mwingiro, Ukamilishaji wa vyumba vinane vya madarasa vya Shule mpya ya Sekondari Itetemia, na Ukamilishaji wa Zahanati ya Kijiji cha Nyang’hwale.

Pia Kamati hiyo ilifika kukagua ukamilishaji wa Zahanati ya Kijiji cha Bugombela iliyopo Kata ya Nyamtukuza, Ukamilishaji wa Jengo la Utawala la Halmashauri na Kutembelea Kikundi cha akina mama “TUJIKOMBOE" kilichopo kata ya Kharumwa.

Akiwa kwenye ukaguzi wa miradi hiyo, Mwenyekiti wa CCM Wilaya, Ndugu Adam Mtole amesema kuwa ni muhimu thamani ya fedha iweze kuonekana kwenye miradi yote inayotekelezwa Wilayani Nyang’hwale.

“Nimeelekeza utekelezaji wa miradi hii uendane na thamani ya fedha iliyokusudiwa na miradi ikamilike kwa wakati ili tuweze kurahisisha utoaji wa huduma bora kwa Wananchi wetu”. Amesema Ndugu, Mtole

Katika hatua nyingine amesema kuwa si vyema wakati wa utekelezaji miradi hii kujihusisha na vitendo vyovyote vya ubadhilifu kwa kuwa vitendo hivyo ni kinyume na maadili na vinadumaza kasi ya maendeleo.

Wakiwa kwenye mradi wa ukamilishaji wa jengo la Utawala la Halmashauri  Wajumbe wa kamati hiyo ya siasa wameridhishwa na kasi kubwa ya maendeleo ya ujenzi huo kwa kuwa hali ya hivi sasa inaridhisha  ukilinganisha na hapo awali.

Ziara hiyo itaendelea leo, Januari 24, 2024 kwa kuendelea kutembelea na kukagua miradi mingine inayoendelea kutekelezwa Wilayani Nyang’hwale.