SIMAMIENI MASHAMBA YA SHULE KUONGEZA UPATIKANAJI WA CHAKULA – MKURUGENZI MTENDAJI NYANG’HWALE

Posted on: August 27th, 2024

Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni, amewaagiza Maafisa ugani kusimamia ipasavyo mashamba ya Shule ili kuongeza tija ya upatikanaji wa chakula Shuleni.

Ametoa maagizo hayo leo Agosti 27, 2024 kwenye kikao kazi cha kamati ya lishe kilichoketi kujadili Shughuli zilizotekelezwa kwa kipindi cha robo ya nne kuanzia Aprili hadi Juni, 2024.

Ameelekeza kuwa kila Shule ilime ekari mbili za mashamba ya chakula ili kuimarisha upatikanaji mzuri wa chakula kitakachoweza kutosheleza kwa wanafunzi wote kwenye kila Shule.

Aidha, amemuagiza Afisa lishe kwa kushirikiana na Maafisa Elimu kusimamia uanzishwaji wa klabu za lishe kwenye Shule zote za Msingi na Sekondari. Kupitia klabu hizo Wanafunzi watapata fursa ya kujifunza kwa vitendo umuhimu wa lishe bora.

Pamoja na mambo mengine, Mkurugenzi Mtendaji ameipongeza Kamati ya Lishe kwa kuiwezesha Halmashauri ya Wilaya ya Nyang’hwale kufanya vizuri kwenye viashiria vya kupima hali ya lishe kwa kipindi cha robo ya nne kuanzia Aprili hadi Juni 2024.