SIKU YA FAMILIA WAZAZI WATAKIWA KUIMARISHA FAMILIA

Posted on: May 15th, 2025

Katibu Tawala wa Wilaya ya Nyang’hwale Ndg. Kaunga Omari leo Mei 15, 2025 ameshiriki katika maadhimisho ya Siku ya Familia Duniani Kiwilaya yaliyofanyika katika ukumbi wa Kituo cha Uwezeshaji Wananchi Kiuchumi.

Siku ya Familia Duniani huadhimishwa kila mwaka ifikapo tarehe 15, Mei ambapo lengo kubwa ni kuziweka na kuzikumbusha Familia umuhimu wa kuzingatia malezi na makuzi bora kwa Watoto.

Akiwa katika maadhimisho hayo Katibu Tawala (W) amewataka Wazazi kuzingatia namna sahihi ya kutunza Familia ili kuwa na familia bora na imara katika Jamii ambapo amesema Mtoto anatakiwa kupewa malezi bora kuanzia kipindi cha ujauzito hadi anapofikisha umri wa miaka 18.

Aidha, Mratibu wa Familia Ndg. Imelda Saga amesema Wazazi wanatakiwa kuhakikisha Watoto hawaendi maeneo hatarishi ili kuepuka kufanyiwa vitendo vya kikatili na kutenga muda wa kuongea na kufuatilia mienendo ya Watoto mara kwa mara.

Pia, amesema Wazazi wahakikishe Watoto wanatumia vifaa vya kielektroniki kama vile Simu, intaneti na Runinga kwa uangalizi wa karibu ili kuepuka mmomonyoko wa maadili kwa Watoto.

Vilevile, amesema Familia zielekeze Watoto kutimiza wajibu wa kuheshimu na kupokea maelekezo ya Wazazi au Walezi kwa kuwa ndio msingi wa utii, uadilifu na uzalendo ili kujenga misingi imara ya ustawi na maendeleo ya Mtoto.

Halikadhalika muwezeshaji kutoka Bank ya NMB amewaeleza Wazazi namna ya kufanya uwekezaji kwa Watoto ambapo amewasahauri Wazazi kuwafungulia Watoto akaunti za kifedha ili ziweze kuwasaidia baadae katika masomo na matumizi mengine.

Kauli mbiu ya Siku ya Familia Duniani kwa mwaka 2025 inasema “Mtoto ni Malezi: Msingi wa Familia bora kwa Taifa imara.”