SERIKALI YARIDHIA KUGAWA SEHEMU YA ARDHI YA HIFADHI KWA MATUMIZI YA VIJIJI

Posted on: July 23rd, 2023

Mkuu wa Wilaya ya Nyang’hwale, Mhe, Grace Kingalame, jana Julai 22, 2023 ametangaza hatua ya serikali kuridhia kugawa sehemu ya ardhi ya hifadhi ya Msitu wa Mienze kwenda kwenye miliki ya wananchi wa vijiji vya Bujuramienze na Ihushi.

Mhe, Mkuu wa Wilaya alimbatana na Kamati ya Ulinzi na usalama ya Wilaya, Mkurugenzi Mtendaji, Bi Husna Toni na Mwenyekiti wa Halmashauri ya Wilaya ya Nyang’hwale, Mhe, John I. John.

Hatua hiyo imefikiwa baada ya hapo awali Serikali kuunda kamati ya mawaziri wanane kuchunguza migogoro ya ardhi itokanayo na wananchi kuvamia maeneo ya hifadhi za misitu na kufanya shughuli za kiuchumi na makazi.

Kamati hiyo ya mawaziri ilifika Wilaya ya Nyang’hwale Oktoba 26, 2021, na kutembelea maeneo yaliyovamiwa na kuchukua mapendekezo kutoka kijiji cha Bujuramienze kata ya Nyabulanda na Kijiji cha Ihushi kata ya Shabaka.

“Baada ya kuundwa Tume hiyo iliamuriwa kwamba tupewe ekari 1852 kwa Kijiji hiki cha Bujuramienze na ekari 331 kwa kitongoji cha Ihushi ili mambo yetu yaende na sasa ekari hizo zipo mikononi mwetu” Alisema Mhe, Mkuu wa Wilaya.

Aidha, Mhe, Mkuu wa Wilaya alisisitiza wananchi kuzingatia matumizi bora ya ardhi na kuheshimu mipaka ya maeneo ya hifadhi kama ilivyoainishwa mipaka hiyo na serikali kupitia wataalamu wetu wa ardhi.

Wananchi wa vijiji hivyo wameishukuru sana Serikali na Mhe, Rais, Dtk. Samia Suluhu Hassan kwa hatua hiyo muhimu ya kuwapatia ardhi kwa kuwa itawasaidia katika shughuli zao za kiuchumi na watapata maeneo ya kujenga miundombinu ya taasisi kama shule na Zahanati.