SERIKALI YAIMARISHA KANUNI ZA WAJIBU WA WAMILIKI WA LESENI ZA MADINI KWA JAMII (CSR)

Posted on: October 20th, 2023

Katika kuhakikisha Jamii inayozungukwa na shughuli za uchimbaji wa madini inanufaika na shughuli hizo, Serikali imeboresha Utaratibu wa Wamiliki wa leseni za madini juu ya namna ya kuwajibika kwa Jamii kwa kuunda kanuni zinazotoa mwongozo wa utekelezaji wake.

Hayo yameelezwa leo Oktoba 19, 2023, kupitia kikao maalum kilichoandaliwa na Kampuni ya uchimbaji madini ya Barrick Bulyanhulu inayofanya shughuli zake katika Halmashauri ya Wilaya ya Nyang’hwale Mkoani Geita na Halmashauri ya Wilaya ya Msalala iliyopo Mkoani Shinyanga.

Kikao hiko maalumu kimehudhuriwa na Mkuu wa Wilaya ya Nyang’hwale, Mhe. Grace Kingalame, akiwa na  Kamati ya Usalama (W), Wataalamu kutoka Tume ya Madini, Mkurugenzi Mtendaji (W), Ndugu, Husna Toni na Wataalamu kutoka ofisi ya Mkurugenzi.

Hapo awali, Kampuni zinazomiliki leseni za uchimbaji wa madini hazikua zikiongozwa kikanuni za namna ya uwajibikaji wao kwa jamii iliyo karibu na shughuli za uchimbaji. Hivyo basi, Serikali kupitia Wizara ya Madini imeona tija ya kuunda kanuni hizo kwa maslahi mapana ya jamii na serikali kwa ujumla.

Mtaalamu kutoka Tume ya Madini, Ndugu Kasmili Daudi, wakati akitoa mada kuhusu kanuni hizo alieleza kuwa, mmiliki wa leseni ya madini atawajibika kuandaa mpango madhubuti wa wajibu wake kwa jamii kwa kushirikisha Halmashauri ya Kijiji au Mtaa uliopo katika eneo lenye shughuli za  madini kupitia Halmashauri husika.

Aidha, Jamii zilizopo au zinazozunguka eneo lenye shughuli za madini zitanufaika na mpango wa wajibu kwa jamii (CSR) kwa utaratibu wa kiasi cha asilimia 40 kitatengwa kwa ajili ya miradi ya kijiji au mtaa ambapo shughuli za madini zinafanyika, na kiasi cha asilimia 60 kwa ajili ya miradi mingine ya Halmashauri. Alieleza Ndugu, Kasmili

Kanuni hizo zinaelekeza kuwa, Kila Halmashuri ya Wilaya, Mji, Manispaa au Jiji ambako shughuli za madini zinafanyika itaundwa “Kamati ya Wataalam  kuhusu Wajibu wa Mmiliki wa Leseni ya Madini kwa Jamii”.

Kamati hiyo itaundwa na Mkurugenzi Mtendaji (Mwenyekiti), Afisa Mipango (Katibu), Afisa wa Tume ya Madini wa eneo husika, wawakilishi wawili wa mmiliki wa leseni ya madini, Mhandisi, Wakili wa Serikali, Afisa Mazingira, Aafisa Maendeleo na Afisa kutoka katika mradi mahsusi unaotekelezwa.

 Hivyo,Mmiliki wa leseni ya madini atawajibika kutekeleza mpango wa wajibu wake kwa jamii kwa kuzingatia taratibu za ununuzi na Halmashauri itawajibika kusimamia utekelezaji wa mpango  ikiwa ni pamoja na kukagua mikataba yote, makadirio ya kiasi (BOQ) na nyaraka zinazohusiana utekelezaji wa mpango