PONGEZI KWA SHULE ZILIZOFANYA VIZURI KATIKA MTIHANI WA KIDATO CHA NNE 2022, NYANG’HWALE.

Posted on: May 23rd, 2023

Halmashauri ya Wilaya ya Nyang’hwale kupitia mradi wake wa kuinua ufaulu kwa shule za sekondari, ujulikanao kama Performance Imrovement Project (P.I.P), leo Mei 23, 2023 imezipongeza shule zilizofanya vizuri kwenye matokeo ya kidato cha nne 2022. Pongezi hizo zimetolewa kwa kuwagawia zawadi mbalimbali kwa wanafunzi, walimu, wazazi na shule kwa ujumla, kulingana na matokeo waliyopata kwenye mtihani huo uliofanyika mwaka jana, 2022.

Akitoa historia fupi ya mradi huo, Afisa Taaluma Elimu Sekondari Wilaya ya Nyang’hwale, Bw. Christopher Makoye alisema kuwa, mradi huo ulianzishwa mwaka 2019 ukiwa na lengo la kila shule ya sekondari iliyopo ndani ya mipaka ya Halmashauri ya Wilaya ya Nyang’hwale, inahakikisha wanafunzi wanaofanya mtihani wa kidato cha nne wanakua na ufaulu wa daraja la kwanza kuanzia idadi ya wanafunzi kumi (10) na kuendelea.

Aidha alieleza kuwa, tekelezaji wa mradi huo hufanyika kwa kuhakikisha kunakua na upatikanaji wa chakula cha wanafunzi wa kidato cha nne na walimu, ununuzi wa vitabu vya rejea na kiada, na utoaji wa motisha kwa walimu, wazazi na shule zilizofanya vizuri.

Bw. Christopher Makoye alisema, tathmini inaonesha kuwa mradi huo wa kuinua ufaulu kwa shule za sekondari unaleta matokeo chanya kwa kuwa kumekua na ongezeko la ufaulu wa daraja la kwanza na ubora wa matokeo yote kwa ujumla.

Katibu Tawala wa Halmashauri ya Wilaya ya Nyang’hwale, Mhe. Fabian Yinza  Akishirikiana na Mkurugenzi Mtendaji wa wilaya, Mhe. Husna Toni. waligawa zawadi ya fedha taslimu na zawadi nyengine mbalimbali kwa wanafunzi, walimu, wazazi na shule zilizofanya vizuri katika matokeo ya mtihani huo.

Sambamba na hilo, Katibu Tawala alisisitiza kuwa, Walimu, Wazazi, Watendaji wa kata na Wenyeviti wa vijiji washirikiane katika kuzishughulikia changamoto zote zinazosababisha kuzorota kwa ubora elimu. Alizitaja changamoto hizo kuwa ni pamoja na utoro, mimba kwa wanafunzi, na ndoa za utotoni.

Katibu Tawala alimalizia kwa kumshukuru Rais wa Jamhuri ya muungano wa Tanzania, Mhe. Samia Suluhu Hasssan na wadau mbalimbali wa maendeleo kwa kuendelea na juhudi za kuboresha miundombinu katika sekta ya elimu kupitia miradi mbalimbali inayoendelea kutekelezwa katika Halmashauri ya Wilaya ya Nyang’hwale.