Pikipiki za Waratibu wa Elimu kuboresha Elimu Nyang’hwale

Posted on: October 19th, 2018

Mkuu wa Wilaya ya Nyang’hwale Mhe. Hamimu Gwiyama amewataka Waratibu wa Elimu ngazi wa Kata kwenda kuzitumia Pikipiki walizopewa kuboresha ufuatiliaji ili kuinua Kiwango cha Ufaulu kwa shule za Msingi na Sekondari.

Amesema hayo jana alhamis kwenye viwanja vya Ofisi ya Mkuu wa Wilaya wakati akikabidhi Pikipiki kumi na tano kwa Waratibu wa Elimu wa kata zote kumi na tano za Wilayani hapa zilizotolewa na Wizara ya Elimu, Sayansi na Teknlojia kupitia Mradi wa LANES, pamoja na Vifaa Vya Tiba vilivyotolewa na Wafadhili wa USAID BORESHA AFYA.

Mhe. Gwiyama amewataka wasimamizi hao wa Elimu kwa ngazi ya Kata kuhakikisha wanazitumia Pikipiki hizo kuzifikia shule zao na sio kukaa Ofisini na kuacha elumu ikishuka. “Kwenye Elimu bado hatujafanya vizuri, sekondari mwaka jana tulipata divisioni one sita tu, sasa vitendea kazi mmepata nasi tunataka matokeobora”.alisema Mkuu wa Wilaya.

Aidha, Mhe Gwiyama amewataka idara ya Afya kuhakikisha wanatoa Mafunzo kwa wataalamu watakaokwenda kuvitumia vifaa hivyo kwani kwa kufanya hivyo itasaidia kuvitunza vifaa hivyo visiharibike kwa kuvitumia visivyo.

Mbunge wa Jimbo la Nyangh’hwale Ndugu, Hussein Nassor alimshukuru Serikali kwa kutoa Vitendea kazi hivyo na kuwataka watendaji hao kwenda kuvitumia vifaa hivyo kama ilivyokusudiwa.

Naye Mwenyekiti wa Halmashauri ya Nyangh’hwale alimshukuru Mheshimiwa Rais na Serikali ya awamu ya tano kwa msaada huo na akaahidi kuvitumia vifaa hivyo kama ilivyopangwa kwa manufaa ya Halmashauri anayoisimamia.

Katibu wa Chama cha Mapinduzi wa wilaya ya Nyang’hwale Ndugu, Gervas Bidogo aliwasihi waratabu wa Elimu kutokwenda kuzitumia Pikipiki hizo kama boda boda kwani kwa kufanya hivyo watakuwa wamekiuka matakwa ya Vitendea kazi hivyo kwenye kuboresha Elimu.

Awali, Kaimu Mganga Mkuu wa Wilaya ya Nyangh’hwale ndugu Emmanuel Kadelya alitambulisha vifaa vilivyotolewa na Wafadhili hao kuwa ni pamoja na ‘Vacuum Extractor’ kifaa cha kinachomsaidia mama kujifungua mtoto anapokaribia kutoka na mama akaishiwa nguvu. HBB Resuscitor, kifaa cha kumsaidia mtoto kupumua endapo atazaliwa akiwa na shida ya kupumua.

Ultra Sound, ni Miongoni mwa vifaa vilivyotolewa na wafadhili hao ambapo vifaa hivi hutumika kutambua jinsia ya mtoto pamoja na ulalo wa Mtoto na atapooneka kuwa amelala vibaya basi itamsaidia daktari kufanya upasuaji kwa mama huyo ili kuokoa uhai wa mama na mtoto. Infant Weighing Scale pia ni Miongoni mwa vifaa vilivyotolewa ambapo hutumika kupima uzito wa mtoto mara tu anapozaliwa na endapo atakua na uzito mdogo sana atawekwa kwenye chumba maalumu kwa uangalizi.

Meza, viti, Bembea za Watoto, mipira wa kuchezea mpira wa miguu na pete, Runinga na Vifaa vya Music ni Miongoni mwa vifaa vilivyotolewa na Wafadhili hao kwa ajili ya kuboresha Huduma za Afya kwa vituo vya Afya Kharumwa na Nyang’hwale Wilayani hapa.