OFISI YA DC YAKABIDHI BATI 216 KWA SHULE 3 ZA MSINGI

Posted on: January 11th, 2025

Kwa niaba ya Mkuu wa Wilaya ya Nyang'hwale, Kaimu katibu Tawala Ndg. Vitais Ndunguru, Jana Januari 10, 2025 amekabidhi bati 216 (Gauge 28) kwa Shule za Msingi Ipalang’ombe, Igeka na Ibambila kwa ajili ya ukamilishaji wa vyumba vya madarasa vilivyojengwa kwa nguvu za Wananchi.

Akiwa katika ziara hiyo Kaimu Katibu Tawala ametoa rai kwa Wazazi kuhakikisha ifikapo Januari 13, 2025 Watoto waliochaguliwa kujiunga na Kidato cha Kwanza wanaenda kuripoti shule na kuhakikisha Watoto wanajiunga na Shule za awali na msingi.

Aidha Kaimu Katibu Tawala Wilaya ameridhishwa na maandalizi ya miundombinu ya Shule za Sekondari ikiwemo ujenzi wa Shule mpya ya Sekondari kata ya Kharumwa ambapo maandalizi hayo ni ya kuwapokea Kidato cha Kwanza wanaotarajiwa kujiunga na Shule hizo mwaka 2025.

Halikadhalika, Kaimu Afisa Elimu Msingi (W) Mwl. Jonathan Lwezarula amesema lengo la kuandikisha Wanafunzi wa Awali kwa mwaka 2025 lilikuwa 7041 na hadi sasa wamefanikiwa kuandikisha Wanafunzi 4577 sawa na Asilimia 65.

Kwa upande wa uandikishaji wa darasa la kwanza lengo lilikua kuandikisha Wanafunzi 7006 na hadi sasa wamefanikiwa kuandikisha Wanafunzi 4971 sawa na Asilimia 71.

Vilevile kaimu Afisa Elimu Sekondari (W), Mwl. Elias Mwalongo amesema Wanafunzi wanaotarajiwa kujiunga na Kidato cha Kwanza kwa mwaka 2025 ni 2705.