NYANG’HWALE YAUNGANA NA WATANZANIA KWENYE DUA YA KULIOMBEA TAIFA KUELEKEA MAADHIMISHO YA MIAKA 60 YA SIKUKUU YA MUUNGANO

Posted on: April 23rd, 2024

Wananchi wa Wilaya ya Nyang’hwale wameungana na Watanzania wote katika dua na sala ya kuliombea Taifa jana Aprili 22, 2024 katika viwanja vya Sabasaba kata ya Kharumwa.

Mkuu wa Wilaya ya Nyang’hwale, Mhe. Grace Kingalame ameshirikiana na Viongozi wa dini kuongoza ibada hiyo maalumu ya kuliombea Taifa kuelekea kilele cha maadhimisho ya miaka 60 ya sikukuu ya Muungano.

Akitoa hotuba yake kwa Wananchi, Mhe. Kingalame amesema kuwa dua hiyo ni maalum kwa ajili ya kuliombea Taifa kuendelea kudumu katika muungano huo uliodumu kwa miaka 60 tangu waasisi wetu Hayati Julius Nyerere na Hayati Sheikh Amani Abeid Karume walipochanganya udongo na kusaini hati kama ishara ya muungano.

Amesema kuwa pamoja na waasisi wa muungano huu kutangulia mbele ya haki, lakini misingi waliyoijenga na kuiacha imeendelea kuimarisha umoja, amani, utulivu na mshikamano wa Taifa.

“Hakika utamaduni tuliojijengea wa kuwa na vikao vya pamoja vya kujadili na kuzipatia ufumbuzi changamoto zinazojitokeza  za muungano kwa kuzingatia misingi ya umoja na mshikamano umeimarisha na kudumisha Muungano kwa kiasi kikubwa” Ameeleza Mhe. Kingalame.

“Katika Wilaya yetu ya Nyang’hwale kwa kipindi cha miaka 60 ya muungano tumefanikiwa kuwa na Shule 74 za Msingi, Shule 17 za Sekondari, vituo vya Afya 4, Zahanati 32, kuimarika kwa miundombinu ya barabara, na huduma za umeme na maji” Ameongeza Mhe. Kingalame.

Mbunge wa Jimbo la Nyang’hwale, Mhe. Nassor Amar Kassu, amewataka Wananchi kuendelea kudumisha amani na kuuenzi muungano ulioasisiwa na viongozi wetu waliotangulia mbele ya haki.

Mhe. Kingalame alimalizia kwa Kumshukuru Rais wa Jamhuri ya Muungano wa Tanzania Mhe. Samia Suluhu Hassan na Rais wa Serikali ya Mapinduzi ya Zanzibar, Mhe. Hussein Ali Mwinyi kwa kuendelea kudumisha muungano wetu.