NYANG’HWALE YAJIKITA KWENYE MIKAKATI YA KUBORESHA HALI YA LISHE

Posted on: October 19th, 2023

Halamshauri ya Wilaya ya Nyang’hwale kupitia kamati yake ya Lishe ya Wilaya imefanya Kikao chake cha kutathmini shughuli zilizotekelezwa kwa kipindi cha robo ya kwanza (Julai – Septemba) ya mwaka wa fedha 2023/2024.

Kupitia kikao hiko, Kamati imeweka mikakati kadhaa ya kuhakikisha inaimarisha hali ya ubora wa Lishe kwa Watoto na jamii yote kwa ujumla. Utekelezaji wa mikakati hiyo ni pamoja na  kuhakikisha kunakua na uhakika wa upatikanaji wa chakula na maji safi na salama mashuleni.

Aidha, Mjumbe wa Kamati ya Lishe, kupitia Idara ya Kilimo amesema kuwa Idara imejipanga kusambaza mbegu za viazi lishe kwa shule zote ili kutatua suala la chakula Shuleni. Ambapo kwa sasa mbegu hizo zipo tayari katika kitalu nyumba cha mbegu kilichopo eneo la Nyamgogwa.

Sambamba na hilo wajumbe wa kamati hiyo wamesisitiza uwepo wa uhakika wa upatikanaji wa maji safi na salama mashuleni. Wameeleza kuwa maji yanayotumiwa kwa ajili ya kunywa mashuleni ni lazima yachemshwe kufikia nyuzi joto zinazotakiwa na ikibidi yawekwe dawa ya kutibu maji hayo.

Mwenyekiti wa Kamati, ambae pia ni Mkurugenzi Mtendaji wa Halmashauri, Ndugu, Husna Toni ameelekeza kuhama kwenye matumizi ya nishati ya kupikia kutoka kwenye matumizi ya kuni na kutafuta nishati mbadala kama vile gesi, bayogesi, na mkaa poa.

Pia, Afisa lishe, Somoe mesema, shughuli zilizotekelezwa na Idara hiyo kwa kipindi cha kuanzia Julai- Septemba ni pamoja na kuwajengea uwezo walimu wa Afya na lishe. Ambapo jumla ya walimu 86 wamefanyiwa mafunzo kuhusu Afya na Lishe mashuleni.

“Maadhimisho ya Siku ya Afya na Lishe ya Kijiji (SALIKI) ambapo tumetoa elimu ya uzazi wa mpango, elimu dhidi ya ukatili wa kijinsia, kuhamasisha wananchi kujiunga na bima ya Afya ya Ichf na kufanya tathmini ya hali za Lishe kwa Watoto na watu wazima” Aliongeza