Nyang'hwale kutumia Biliomi 24 Mwaka wa Fedha 2019/20

Posted on: February 21st, 2019

Jana jumatano Baraza la madiwani la Halmashauri ya Wilaya ya Nyang’hwale imepitisha bajeti ya Halmashauri hiyo kwa mwaka wa Fedha 2019/2020 yenye jumla ya Tshs: 24,617,556,201.00 zitazotumika katika shughuli mbalimbali kwa mchanganuo ufuatao:

Makisio ya mapato na matumizi kwa mwaka wa fedha 2019/2020

Akiwasilisha bajeti hiyo Afisa Mipango wa Halmashauri Ndugu Magoti Pius amesema bajeti hiyo imeshuka kwenye makusanyo ya Ndani kutoka BIlioni 1.2 ya mwaka wa Fedha unaoendelea hadi Milioni 832 kwa mwaka wa Fedha ujao kutokana na chanzo cha zao la pamba kushuka uzalishaji kutokana na mvua. Aidha ametaja pia chanzo cha Ushuru wa Huduma kutoka Mgodi wa Acacia kimeshuka kwa asilimia tisini tofauti na awali kutokana na Kampuni hiyo ya Uchimbaji wa Dhahabu kupunguza uzalishaji kwa asilimia tisini na kuathiri kodi ya Huduma wanayotoa kwenye Halmashauri hiyo.

Akiongea wakati wa kufunga Baraza hilo, Mwenyekiti wa Halmashauri hiyo Mheshimiwa John Isack aliwataka wakuu wa idara kufanya kazi kwa bidii na kuhakikisha kila idara inakusanya vizuri Mapato yaliyopo kwenye idara zao. “Bajeti ya mwaka ujao tumeshaipitisha, sasa nawaagiza wakuu wa idara kukaza buti kukusanya Mapato kwa ajili ya bajeti tunayoendelea nayo na tuwe na mikakati mizuri ya kutekeleza Bajeti ijayo”….alisema.

Awali Mkuu wa Wilaya ya Nyang’hwale Mheshimiwa Hamimu Gwiyama alifafanua kuhusu matumizi sahihi ya Vitambulisho vya Wajasiliamali wadogo vilivyotolewa nchi nzima ambapo alisisitiza matumizi sahihi yazingatiwe kwani atakayekiuka atachukuliwa hatua za sheria ya kodi.

Aidha, Mheshimiwa Ndozi Mayala diwani wa kata ya Nyugwa aliwataka timu ya Mapato ya Halmashauri kushirikiana na Watendaji wa kata na Vijiji kwenye kufuatilia Mapato ya Makarasha na Viwanda vya kuchenjua Dahahabu kwani wao ndio wanazifahamu vizuri kazi hizo na wahusika wapo nao kwenye maeneo yao wakati wote hivyo itasaidia kupata Mapato bila kukwepa.

Baraza la madiwani wilayani Nyang’hwale limeketi siku mbili kupitia mapitio ya Bajeti ya mwaka wa Fedha unaoendelea ambayo yalionekana kukusanya kwa asilimia 28 tu  badala ya asilimia 50 mpaka sasa ikiwa ni nusu mwaka na siku ya pili limepitisha bajeti ya Halmashauri hiyo kwa mwaka wa Fedha 2019/2020.