NAWAPONGEZA NYANGH’WALE KWA KUSIMAMIA MIRADI KWA UFANISI - RC SHIGELA

Posted on: May 22nd, 2024

Mkuu wa Mkoa wa Geita, Mhe. Martine Shigela Jana Mei 22, 2024 ameipongeza Wilaya ya Nyang’hwale kwa kutekeleza na kusimamia miradi ya maendeleo kwa ufanisi na ubora mkubwa.

Ameyasema hayo akiwa kwenye ziara ya kukagua miradi ya maendelo pamoja na kikao maalum cha kuzungumza na wadau wa sekta ya madini Wilayani Nyang’hwale.

Mhe. Shigela amekagua mradi wa ujenzi wa Bweni la Wanafunzi wenye mahitaji maalum katika shule ya Msingi Bupamba, ambapo ujenzi huo unagharimu Tsh. Milioni 128 fedha kutoka Serikali kuu na upo kwenye hatua ya ukamilishaji.

“Dhamira ya Mhe. Rais ni kuona wale watoto wanaoshindwa kwenda shuleni kwa sababu ya mazingira ya ulemavu waliyonayo na wanahitaji msaada wa kupelekwa shuleni na kurudishwa, Mhe. Rais akaona ni vyema kuwajengea mabweni watoto wetu wenye mahitaji maalum” Amesema Mhe. Shigela

“Nafarijika kuona kwamba bweni limejengwa na limefikia hii hatua, rai yangu kwa Halmashauri ni kuhakikisha kuwa bweni hili linakamilika ndani ya mwaka huu ili tutakapoanza Januari mwakani basi tuanze na watoto wakiwa wanakaa hapa” Ameongeza Mhe. Shigela

Sambamba na mradi huo, amekagua pia mradi wa ukamilishaji wa kituo cha Uwezeshaji Wananchi Kiuchumi, ambapo ukamilishaji huo umefanyika kwa fedha ya ufadhili kutoka Baraza la Taifa la Uwezeshaji Wananchi Kiuchumi wenye thamani ya Tsh. Milioni 247.1.

“Nawapongezeni sana kwa jengo zuri la kituo cha uwezeshaji wananchi kiuchumi, na niwapongeze Wananchi walioasisi jengo hili kwa madhumuni ya kufanya ofisi ya Mkuu wa Wilaya na ndio maana imekua rahisi kwa Serikali kuleta fedha ya umaliziaji na kuwa kituo cha uwezeshaji wananchi kiuchumi” Amesema Mhe. Shigela

“Mkuu wa Wilaya, Katibu Tawala, Mkurugenzi na viongozi wote wa Wilaya nawapongezeni sana kwa kukamilisha jengo kwa ubora mzuri na kwa kweli panaonyesha sasa kwamba kuna uhai mkubwa unaopatikana kwenye Wilaya yetu hii ya Nyang’hwale” Amesisitiza Mhe. Shigela