MSIMAMIZI WA UCHAGUZI WA HALMASHAURI YA WILAYA NYANG’HWALE ATOA MAELEKEZO KUELEKEA UCHAGUZI WA SERIKALI ZA MITAA

Posted on: September 26th, 2024

Msimamizi wa Uchaguzi wa Halmashauri ya Wilaya ya Nyang’hwale Ndg. Husna Toni leo Septemba 26, 2024 ametoa maelekezo ya Uchaguzi wa Serikali za Mitaa unaotarajiwa kufanyika Novemba 27, 2024.

Maelekezo hayo ameyatoa katika Ukumbi wa Halmashauri na kuhudhuriwa na makundi mbalimbali ya Wadau wa Uchaguzi ikiwa ni pamoja na Viongozi wa vyama vya Siasa, Viongozi wa dini, Viongozi wa Wafanya biashara, Watendaji wa Vijiji,  Watendaji wa Kata na Vyombo vya Ulinzi na Usalama.

Msimamizi wa Uchaguzi wa Halmashauri ya Wilaya ya Nyang'hwale, Ndg. Husna Toni akitoa Maelekezo ya Uchaguzi wa Serikali za Mitaa

Amesema kuwa maelekezo hayo yanafafanua hatua muhimu zitakazoongoza mchakato wa Uchaguzi kuanzia uandikishaji wa wapiga kura, uchukuaji na urejeshaji wa fomu za kugombea, uteuzi wa wagombea na tarehe ya siku ya uchaguzi.

“Maelekezo haya yanalenga kutoa mwongozo ili kuhakikisha uchaguzi unafanyika kwa wazi, haki na kwa kuzingatia sheria na taratibu zilizowekwa” Amefafanua

Aidha, ameeleza sifa za Mpiga Kura kuwa ni pamoja na Awe na umri wa miaka 18 au zaidi, Awe raia wa Tanzania, Awe mkazi wa eneo la Kitongoji, Awe na akili timamu na Awe amejiandikisha katika Kitongoji husika.

Sambamba na hayo ametoa wito kwa Wananchi kujitokeza kushiriki katika zoezi la kujiandikisha kwenye daftari la orodha ya wapiga kura litakalofanyika kwa siku kumi kuanzia Oktoba 11 hadi 20, 2024.

Katibu Tawala wa Wilaya ya Nyang'hwale, Ndg. Kaunga Omari akitoa neno mara baada ya Msimamizi wa Uchaguzi kutoa maelekezo ya Uchaguzi wa Serikali za Mitaa

Pia amewataka Wananchi kujitokeza kwa wingi siku ya Uchaguzi utakaofanyika siku ya Jumatano Novemba 27, 2024 ili waweze kuchagua viongozi ngazi ya Vijiji na Vitongoji.

Pamoja na mambo mengine, Msimamizi wa Uchaguzi ameeleza tarehe za kuanza na kumalizika kwa Kampeni za Uchaguzi, ambapo zitaanza Novemba 20 hadi 26, 2024 kuanzia Saa 2 kamili Asubuhi hadi Saa 12 kamili jioni.

Uchaguzi wa Serikali za Mitaa mwaka 2024 unaongozwa na kauli mbiu isemayo “Serikali za Mitaa, Sauti ya Wananchi, Jitokeze Kushiriki Uchaguzi”

Afisa Uchaguzi Wilaya ya Nyang'hwale, Ndg. Dickson Msumari akizungumza na wajumbe