MKUTANO WA PILI WA BARAZA LA MADIWANI KWA ROBO YA PILI YA MWAKA WA FEDHA 2023/2024

Posted on: March 1st, 2024

Mwenyekiti wa Halmashauri ya Wilaya ya Nyang’hwale, Mhe. John I. John ameongoza Mkutano wa pili wa baraza la madiwani kwa robo ya pili ya mwaka wa fedha 2023/2024 ulioketi jana Februari 29, 2024.

Mkutano huo pia ulihudhuriwa na viongozi mbalimbali ngazi ya Wilaya, ikiwa ni pamoja na Mbunge wa Jimbo la Nyang’hwale, Mhe. Nassor Amar Kasu, kamati ya ulinzi na usalama (W), viongozi wa vyama vya siasa na viongozi wa madhehebu ya dini.

Akiwasilisha taarifa yake, Mwenyekiti wa Halmashauri, ambaye pia ni Diwani wa Kata ya Kafita, Mhe. John I. John, amesema kuwa Kwa kipindi cha Robo ya Pili ya Mwaka wa fedha 2023/2024 Halmashauri imepokea kiasi cha TZS. 1,592,302,423.52 kutoka Serikali Kuu pamoja na Wahisani kwa ajili ya kutekeleza miradi ya maendeleo.

“Kiasi cha TZS 82,545,177.50 Kwa ajili ya kutekeleza na kukamilisha mradi wa Kituo cha Uwezeshaji Wananchi Kiuchumi awamu ya III, kiasi cha TZS 347,855, 139.35 kwa ajili ya miradi ya Ujenzi wa matundu ya vyoo, ukamilishaji wa zahanati, Ujenzi wa Bweni la Shule Maalum, na ukamilishaji wa vyumba vya madarasa”. Amesema Mhe. John

“Halmashauri imeweza kupokea kiasi cha fedha TZS, 883,431,106.67 ya mradi wa kuondoa umasikini kupitia mfuko wa maendeleo ya Jamii (TASAF) kwa ajili ya kutekeleza ujenzi wa miundombinu ya Elimu na Afya”. Ameongeza Mhe. John

Mkurugenzi Mtendaji wa Halmashauri ya Wilaya ya Nyang’hwale, Ndugu, Husna Toni, katika taarifa yake amesema kuwa kwa mwaka wa fedha 2023/2024 Halmashauri ilikasimia kukusanya Tsh. 3,207,499.106 na hali ya makusanyo hadi kufikia Mwezi Disemba 2023, ilikuwa Tsh. 2,014,062,530.73 sawa asilimia 51.85, ambapo hadi kufikia Februari 25, 2024 ukusanyaji ulikua umefikia asilimia 83.

Aidha, katika sekta ya Afya Halmasahuri imeanza kutoa huduma kwa wazazi kupitia wodi mpya iliyopo katika Kituo cha afya Nyijundu, kata ya Nyijindu. Sambamba na hilo, wodi maalumu (Private ward) iliyopo Hospitali ya Wilaya nayo imeanza kutoa huduma, huku wodi ya wazazi iliyopo Kituo cha Afya Kafita ipo hatua ya mwisho kuelekea kuanza kutoa huduma.

Mbunge wa Jimbo la Nyang’hwale Mhe. Nassor Amar Kasu ametumia nafasi hiyo kumshukuru sana Rais wa Jamhuri ya Muungano wa Tanzania, Mhe. Dkt. Samia Suluhu Hassan kwa kutenga fedha nyingi za miradi ya maendeleo katika Wilaya ya Nyang’hwale.