MKUTANO WA KWANZA WA BARAZA LA MADIWANI KWA ROBO YA TATU YA MWAKA WA FEDHA 2023/2024

Posted on: May 16th, 2024

Baraza la Madiwani la Halmashauri ya Wilaya ya Nyang’hwale leo Mei 16, 2024 limeketi Mkutano wake wa kwanza wa robo ya tatu ya mwaka wa fedha 2023/2024 kwenye ukumbi wa jengo la Utawala la Halmashauri.

Mkutano huo wa Baraza umeongozwa na Mwenyekiti wa Halmashauri ambae pia ni Diwani wa Kata ya Kafita, Mhe. John I. John, na kuhudhuriwa na viongozi mbalimbali wa ngazi ya Mkoa na Wilaya.

Akifungua mkutano huo Mhe. John I. John aliwapongeza waheshimiwa madiwani kwa kuendelea kushughulikia changamoto za wananchi katika maeneo yao na kuwataka kuendelea na utaratibu huo wa kutatua kero za Wananchi.

Sambamba  na hilo alitumia nafasi hiyo kuipongeza Kamati ya Ulinzi na Usalama inayoongozwa na Mkuu wa Wilaya ya Nyang’hwale Mhe. Grace Kingalame kwa kuendelea kusimamia maswala ya amani ndani ya Wilaya.

Aidha, Katibu wa Baraza ambae pia ni Mkurugenzi Mtendaji wa Halmashauri ya Wilaya ya Nyang’hwale Ndugu, Husna Toni amewaomba Waheshimiwa Madiwani na Wananchi kwa  ujumla kushiriki katika kipindi maalum cha “Meza ya Afisa Habari’, kinachoangazia mazuri yanayofanywa na serikali ya awamu ya 6 inayoongozwa na Rais, Mhe, Samia Suluhu Hassan.

Waheshimiwa madiwani kwa nyakati tofauti walipata wasaa wa kuwasilisha taarifa za maendeleo ya Kata zao kwa kuangazia miradi na shughuli mbalimbali zilizotekelezwa kwa kipindi cha robo ya tatu kuanzia Januari hadi Machi 2024

Mkutano huo utaendelea kesho Mei 17, 2024.