MICHEZO IIMARISHE MSHIKAMANO NA UMOJA WETU

Posted on: January 20th, 2024

Jamii nyingi zimekuwa zikitumia michezo kama nyenzo muhimu katika kuimarisha Umoja na Mshikamano wa jamii hizo. Hayo yameelezwa jana, Januari 19, 2024 katika Bonanza la michezo mbalimbali ya kuukaribisha Mwaka mpya lililofanyika Uwanja wa Sabasaba.

Bonanza hilo lilijumuisha michezo mbalimbali ikiwemo, Mpira wa miguu, mpira wa pete, karata, drafti na mchezo wa bao. Ambapo sehemu kubwa ya wananchi walijitokeza kujumuika katika katika michezo hiyo.

Mchezo wa mpira wa miguu ilichezwa mechi kati ya wapenzi wa timu ya Simba dhidi ya wapenzi wa timu ya Yanga, ambapo timu ya wapenzi wa Yanga iliitandika timu ya wapenzi wa Simba kwa bao moja kwa sufuri.

Kwa upande wa mchezo wa mpira wa pete, ilichezwa mechi kati ya timu ya Shule ya Msingi Bupamba dhidi ya timu ya Wajasiliamali. Ambapo timu ya wajasiliamali iliichabanga magoli 28 dhidi ya magoli 20 ya timu ya Shule ya Msingi Bupamba.

Mchezo wa Mwisho ulikua unajumuisha Michezo ya jadi, ambapo mchezo wa bao mshindi alikua Ndugu, Said Kanyele, mchezo wa karata mshindi alikua Ndugu, Adam Nassor, na Mchezo wa drafti mshindi aliibuka Ndugu, Mange Fungameza.

Mkuu wa Wilaya ya Nyang’hwale, Mhe. Grace Kingalame akiongea na Wananchi  waliojitokeza kwenye bonanza hilo, amesema kuwa tutumie michezo kuwa ni sehemu ya kudumisha umoja na mshikamano wetu ulioasisiwa tangu hapo awali.

Mhe. Kingalame aliongeza kuwa Michezo ni Afya na Ajira pia, hivyo Wananchi wajitahidi kutumia fursa hiyo kuimarisha afya zao kwa kufanya mazoezi mara kwa mara lakini pia kubaini vipaji walivyonavyo watoto na kuhakikisha wanaviendeleza vipaji hivyo.

Aidha, alitumia Fursa hiyo pia kuwakumbusha Wazazi kuwapeleka watoto shule kwa kuwa hiki ni kipindi cha uandikishaji wa Wanafunzi wa awali, darasa la kwanza na kuwapokea kidato cha kwanza waliopangiwa kusoma  shule mbalimbali za Sekondari.

Imekua ni desturi kwa Wilaya ya Nyang’hwale kuukaribisha Mwaka mpya kwa aina yake, kwa kuandaa mabonanza ya michezo na hafla fupi yanayotoa fursa ya kujenga mahusiano mazuri kwa Watumishi wa Wilaya hiyo na Jamii inayowahudumia.