MHE. DKT. SAMIA ANAJALI MASLAHI YA WAFANYAKAZI – MBUNGE (MWAKILISHI WA WAFANYAKAZI)

Posted on: July 26th, 2024

Mbunge wa viti maalum (Mwakilishi wa Wafanyakazi Bungeni), Mhe. Dkt. Alice Kaijage, leo Julai 26, 2024 amefanya kikao maalum kuzungumza na Watumishi wa Halmashauri ya Wilaya ya Nyang’hwale kwenye ukumbi wa mikutano wa Halmashauri.

Mhe, Dkt. Alice amezungumza na watumishi hao kuhusu mambo mbalimbali ikiwa ni pamoja na kusikiliza changamoto zao na kuzitolea ufanunuzi.

Pamoja na mambo mengine, Mhe. Dkt. Alice amesema kuwa anamshukuru Mhe. Rais Dkt. Samia Suluhu Hassan kwa kujali maslahi ya Watumishi ikiwa ni pamoja na kuongeza ajira,  kupandisha vyeo na madaraja, na kulipa madeni na stahiki za Watumishi.

“Kwa muda wa miaka miwili tangu alivyoingia madarakani Machi 2021 hadi kufikia Juni 2023 Mhe. Dkt. Samia amepandisha vyeo na madaraja Watumishi 455,000 “ Amesema Mhe. Dkt. Alice

“Pamoja na changamoto alizokutana nazo za Ugonjwa wa UVIKO 19 na nyenginezo lakini Mhe. Dkt. Samia ametoa pesa zaidi ya Bilioni 220 kulipa malimbikizo ya mishahara kwa Watumishi 130,166 ndani ya miaka miwili” Ameongeza Mhe. Dkt. Alice

Aidha, Mhe. Dkt. Alice amewasisitiza Watumishi wa Halmashauri ya Wilaya ya Nyang’hwale kujitokeza kwenye zoezi la uboreshaji wa Daftari la Kudumu la Mpiga Kura na kushiriki kwenye uchaguzi wa Serikali za Mitaa mwaka huu 2024 na Uchaguzi Mkuu ifikapo 2025.

Amesema kushiriki uchaguzi ni haki ya kila raia wa Tanzania aliyefikisha umri wa miaka 18 na zaidi, hivyo Watumishi wajitokeze kwa wingi kwenye zoezi hilo ili watumie haki yao ya Msingi ya kuchagua viongozi.

Mhe. Dkt. Alice yupo kwenye ziara ya kikazi mkoani Geita na baada ya kukutana na watumishi wa Halmashauri ya Wilaya ya Nyang’hwale atakutana na Watumishi wa Halmashauri ya Mji Geita.