MBUNGE AKABIDHI KOMPYUTA NA TV MSALALA SEKONDARI

Posted on: April 6th, 2025

Mbunge wa jimbo la Nyang’hwale Mhe. Hussein Amar Kasu jana Aprili 05, 2025 amekabidhi vitendea kazi ambavyo ni Televisheni, Kompyuta, Printa na Photokopi mashine kwa Mkuu wa Shule ya Sekondari Msalala kwa niaba ya Uongozi wa Shule hiyo.

Amekabidhi vitendea kazi hivyo vilivyonunuliwa kutokana na Fedha za Mfuko wa kuchochea maendeleo ya Jimbo pindi alipohudhuria kwenye mahafali ya Kidato cha Sita yaliyofanyika shuleni hapo.

Akizungumza kwenye mahafali hayo Mhe. Mbunge amewataka Wanafunzi kutumia vitendea kazi hivyo kupata maarifa ya kutosha kwa njia ya teknolojia, kusoma kwa bidii, na kuwa na nidhamu  kwenye masomo yao.

“Hatua hii ya kuwakabidhi vitendea kazi hivi ni muhimu kwa maisha yetu, lakini huu ni mwanzo tu wa safari ndefu ya mafanikio tunayoyatarajia, hivyo ongezeni juhudi na nidhamu ili kufanikisha malengo yenu” amesisitiza Mhe. Mbunge.

Ikumbukwe kuwa fedha za mfuko wa kuchochea maendeleo ya jimbo hufanya shughuli mbalimbali za maendeleo kama kumalizia miradi ndani ya jimbo husika.