MAPOKEZI YA VITABU VYA KIADA VYA SHULE ZA SEKONDARI

Posted on: September 14th, 2023

Halmashauri ya Wilaya ya Nyang’hwale imepokea jumla ya vitabu 8,833 vya kiada vya masomo ya Sayansi kwa Shule za Sekondari kutoka Taasisi ya Elimu Tanzania (TET) vyenye thamani ya Shilingi za kitanzania 34,052,184/=.

Wakati wa kukabidhi vitabu hivyo kwa walimu, Mwenyekiti wa Halmashauri, Mhe John I. John, alisema ni wakati sasa wa kuinua kiwango cha taaluma katika Halmashauri yetu kwa kuwa serikali inajitahidi kuboresha mazingira ya kutolea elimu mashuleni.

Mkurugenzi Mtendaji (W), Ndugu, Husna Toni, amewasisitiza walimu kuhakikisha wanavitumia vitabu hivyo kwa usahihi na kwa malengo yaliyokusudiwa. Pamoja na mambo mengine ameelekeza pia kuvitunza ili viweze kutumika kwa muda mrefu zaidi.

Mkakati wa serikali ni kuhakikisha inaweka mazingira wezeshi ya kufundishia kwa walimu na kujifunzia kwa wanafunzi. Mazingira hayo ni pamoja na uwepo wa vitabu vya kutosha mashuleni.

Aidha, Mhe. John I. John amemshukuru Mhe. Rais wa Jamhuri ya Muungano wa Tanzania, Dkt. Samia Suluhu Hassan kwa kuendelea kutenga fedha kwa ajili ya miradi mbalimbali ya maendeleo.