MAAFISA WAANDIKISHAJI WAPATA MAFUNZO KUELEKEA UCHAGUZI WA SERIKALI ZA MITAA

Posted on: October 8th, 2024

Kwa niaba ya Msimamizi wa Uchaguzi wa Halmashauri ya Wilaya ya Nyang’hwale, Afisa Uchaguzi (W)  Ndg. Dickson Msumari leo Oktoba 08, 2024 amefungua mafunzo ya zoezi la Uandikishaji wa Orodha ya Wapiga Kura litakaloanza Oktoba 11 hadi 20, 2024.

Maafisa Waandikishaji wakisiliza mafunzo kutoka kwa wawezeshaji

Akiongea kwa niaba ya Msimamizi wa Uchaguzi, Ndg. Dickson Msumari amewataka Waandikishaji wa Orodha ya Wapiga Kura kuzingatia kananuni za Uchaguzi wa Serikali za Mitaa 2024, Muongozo na Maadili ili kuleta tija kwenye zoezi hilo.

Aidha, amewataka Waandikishaji kushirikiana kikamilifu na wadau wa Uchaguzi ambao ni Vyama vya Siasa, Wagombea, Serikali  na mawakala wa uandikishaji  ili kuleta uwazi na kufanya uchaguzi huru na wa haki.

“Mawakala wa vyama vya siasa watasaidia kuwatambua wakazi wa eneo husika wakati wa uandikishaji na wakati wa upigaji wa kura, hivyo kupunguza kutokea kwa vurugu au malalamiko yasiyokua ya lazima” Amefafanua.

Sanjari na hayo, Hakimu Mfawidhi wa Wilaya ya Nyang’hwale Mhe. Idran D, Chuvaka amewaapisha Waandikishaji wa Orodha ya Wapiga Kura na kuwataka kuwa waaminifu na kutunza siri kuelekea zoezi la uandikishaji.

Maafisa Waandikishaji wakiapa

Muwezeshaji wa Mafunzo ambae pia ni Msimamizi Msaidizi, Mhandisi Dentony Bugenyi amewaeleza Waandikishaji taratibu zinazotakiwa kufuatwa siku ya kuandikisha Wapiga Kura na kuwataka kufanya kazi kwa umakini ili kujiepusha kufanya makosa.

Msimamizi Msaidizi Mhandisi Dentony Bugenyi akiwasilisha mada

Jumla ya Maafisa Waandikishaji 288 wamepata mafunzo hayo na kauli mbiu ya Uchaguzi wa Serikali za Mitaa mwaka 2024 inasema “Serikali za Mitaa, Sauti ya Wananchi, Jitokeze kushiriki Uchaguzi”