MAAFISA KILIMO WATAKIWA KUONGEZA UBUNIFU KUWASAIDIA WAKULIMA

Posted on: August 25th, 2024

Mkurugenzi Mtendaji wa Halmashauri ya Wilaya ya Nyang’hwale, Ndg. Husna Toni amewataka Maafisa Kilimo kuongeza ubunifu ili waweze kuwasaidia wakulima kufanya kilimo bor chenye tija.

Ameyasema hayo Agosti 23, 2024 alipokutana na Wataalamu wote wa Idara ya Kilimo, Mifugo na Uvuvi kwenye shughuli maalum ya kukabidhi vitendea kazi (Vishikwambi 20 na gwanda 16) vilivyotolewa na Serikali ili kuboresha Sekta ya Kilimo, Mifugo, na Uvuvi.

Amesema wakatumie vitendea kazi hivyo kubuni mbinu mbalimbali za kitaalamu zitakazowasaidia wakulima kuzalisha kwa wingi na hatimae kuwa mavuno ya kutosha kwa ajili ya chakula na biashara pia.

Aidha, amesema ni jukumu la wataalamu hao kubadilisha mitazamo ya Wakulima kutoka kwenye kilimo cha mazoea na kufanya kilimo bora kinachozingatia mbinu za kitaalamu kama vile kupima udongo, matumizi ya mbegu bora na zana bora za kilimo.

Makamu Mwenyekiti, Mhe. Revocatus J. Ng’hwaya amemshukuru Mhe. Rais Dkt. Samia Suluhu Hassan kwa kuipatia Halmashauri ya Wilaya ya Nyang’hwale vitendea kazi hivyo vitakavyorahisisha shughuli za kila siku za Maafisa Ugani kwenye maeneo yao.