KUELEKEA SIKU YA WANAWAKE DUNIANI DAS AWATAKA WANAWAKE KUSIMAMA IMARA KATIKA NAFASI ZAO

Posted on: February 21st, 2025

Katibu Tawala Wilaya Ndg. Kaunga Amani leo Februari 21, 2025 ameongoza kikao cha Watumishi Wanawake wa Halmashauri ya Wilaya ya Nyang’hwale katika ukumbi mkubwa wa Halmashauri.

Kikao hiko kimefanyika ikiwa ni maandalizi ya kuelekea siku ya Wanawake Duniani ambapo mada mbalimbali zimewasilishwa kwa Wanawake hao ambazo ni pamoja na elimu ya ujasiriamali, Lishe, Wanawake na Uongozi, Masuala ya Familia, Usafi wa Mazingira, Afya ya Akili, Mahusiano kazini na Maadili.

Akiwa katika kikao hiko Ndg. Kaunga Amani amewataka Wanawake kusimama imara na kusimamia vizuri majukumu yao ya kazi na kuwataka kuepuka mambo ambayo yataharibu utendaji wa kazi pindi wanapokuwa kazini.

Aidha amewataka Wanawake hao kusimamia malezi ya Watoto wote (wakike na wakiume) ili kuepusha mmomonyoko wa maadili katika jamii yetu sababu Wanawake ndo wanawajibika kwenye malezi ya Watoto.

“Tukiwa kama wazazi kwenye mazingira yetu twendeni tukalee Watoto wetu na wanao tuzunguka kwa njia inayopaswa” Amesema Kaunga Amani.

Vilevile Mkurugenzi Mtendaji wa Halmashauri ya Wilaya ya Nyang'hwale Ndg. Husna Toni amewataka Watumishi kufanyakazi kwa kushirikiana na Wadau ili kutimiza malengo ya Taasisi lakini pia kushiriki katika mambo ya kijamii.