KIKAO CHA BARAZA LA MADIWANI CHA ROBO YA NNE 2022/2023

Posted on: August 18th, 2023

Kikao cha Baraza la Madiwani cha robo ya nne kwa mwaka wa fedha 2022/2023 kimefanyika kwa siku mbili kuazia jana Agosti 17, 2023 na kuhitimishwa leo Agosti 18, 2023 katika ukumbi wa Halmashauri ya Wilaya ya Nyang’hwale.

Akiwasilisha taarifa yake Mwenyekiti wa Halmashauri, Mhe. John I. John amesema katika kipindi cha robo ya nne kwa mwaka wa fedha 2022/2023 ameweza kutembelea miradi mbalimbali ya maendeleo inayoendelea kutekelezwa ndani ya Wilaya ya Nyang’hwale.

“Nilifanikiwa kushiriki katika hafla ya ufunguzi wa Miradi ya TASAF iliyofanyika mnamo Mei 25, 2023 kwa ajili ya kukabidhi mradi wa nyumba moja ya Walimu (2 in 1) katika Shule ya Msingi Wenzura pamoja na Bweni la wasichana (Daharia ya wanafunzi 80) katika Shule ya Sekondari Nyijundu” Alisema Mhe. John I. John

“ Niliweza kuratibu ziara ya mafunzo maalum Mkoani Arusha kwa ajili ya kuwajengea uwezo Waheshimiwa Madiwani pamoja na Wakuu wa Idara na Vitengo ikiwa ni kuongeza ufanisi katika utendaji kazi na utoaji huduma kwa kuzingatia utawala bora” Aliongezea Mhe. John I. John

Pia, kupitia ziara hiyo maalum waliweza kupata mafunzo kuhusu dhana ya Uwezeshaji wananchi kiuchumi na utawala bora, ambapo Halmashauri inatarajia kuanzisha kituo cha uwezeshaji wananchi kiuchumi ili kuinua ubora wa Maisha, ustawi wa jamii, hifadhi ya jamii na kupunguza kiwango cha umaskini.

Aidha, Kaimu Mkurugenzi Mtendaji, Majagi Maiga, akiwasilisha taarifa yake alisema, Halmashauri ya Wilaya ya Nyang’hwale katika mwaka wa fedha  2022/2023 imevuka lengo la makisio ya ukusanyaji wa mapato ya ndani kutoka Bilioni 2.6 na kufikia Bilioni 3.2, ambayo sawa na asilimia 107 ya lengo.

“Katika kipindi cha mwaka wa fedha 2022/2023 Halmashauri imepokea fedha kutoka serikali kuu kiasi cha Tsh. Bilioni 6.2 zikiwa ni kwa ajilili ya ujenzi wa miradi mbalimbali katika sekta ya Afya, Elimu, Mazingira na Maji” Aliongeza Bw. Majagi.

Bw. Majagi alimalizia kwa kutoa shukrani za dhati kwa Mhe. Rais wa Jamhuri ya Muungano wa Tanzania, Dkt. Samia Suluhu Hassan kwa kuendelea kutenga fedha kwa ajili ya kutekeleza miradi mbalimbali ya maendeleo Wilayani Nyang’hwale.