KAMATI YA USHAURI YA WILAYA YAPENDEKEZA ONGEZEKO LA KATA NNE

Posted on: March 14th, 2025

Mwenyekiti wa Kamati ya Ushauri ya Wilaya ambaye pia ni Mkuu wa Wilaya ya Nyang’hwale Mhe. Grace Kingalame Jana Machi 13, 2025 ameongoza kikao maalumu cha Kamati ya Ushauri kujadili maeneo mapya ya Kiutawala.

Mkutano huo umejadili ongezeko la maeneo mapya ya Kiutawala katika Halmashauri ya Wilaya ya Nyang'hwale zikiwemo Kata na Vijiji.Kamati hiyo imependekeza kugawanywa kwa Jimbo la Nyang’hwale na kuwa Majimbo mawili ambapo jimbo la kwanza litakuwa linaitwa Kharumwa lenye Kata ya (Kharumwa, Nyugwa, Izunya, Kafita, Bukwimba na Nundu) na Jimbo la pili ni Nyang’hwale ambalo litakuwa na Kata ya (Nyang’hwale, Shabaka, Kakora, Kaboha, Mwingiro, Nyabulanda, Nyamtukuza, Nyijundu na Busolwa).

Aidha, Kamati imependekeza kuongezeka kwa Kata nne ambazo zitagawanywa kutoka kwenye kata za Kharumwa, Shabaka, Nyugwa na Kakora ili kuongeza ufanisi kwenye utoaji huduma kwa Wananchi wanaohishi katika maeneo hayo.

Vilevile Kamati imependekeza kuongezeka kwa Vijiji vinavyopatikana katika Kata mbalimbali ambavyo ni Kijiji cha Igalula na Gulumbai kutoka Kata ya Kafita, Kijiji cha Beya na Shigungumuli kutoka kata ya Nyugwa.

Pia, kamati imependekeza kuanzishwa kwa Kijiji cha Sweya kutoka Kata ya Izunya, Kijiji cha Ikondo na Nyamakala kutoka Kata ya Nyabulanda, Kijiji cha Buzilima kutoka Kata ya Kakora, Kijiji cha Ipalang’ombe na Busulwangili kutoka Kata ya Nundu.

Ikumbukwe kuwa,mchakato wa kuchunguza, kugawa au kubadili majina ya maeneo ya utawala ni maagizo ya Tume huru ya Taifa ya Uchaguzi ambapo mchakato huo hufuata ngazi mbalimbali za kiutawala kwa kuanzia ngazi za chini za mikutano ya Wananchi.Aidha, hufuatiwa na viikao vya Kamati ya Maendeleo ya Kata (WDC), Timu ya menejimenti ya Halmashauri (CMT), Kamati ya Fedha, Uongozi na Mipango (FUM), Baraza la Madiwani, Kamati ya Ushauri ya Wilaya (DCC), na hatimaye kuridhiwa na Kamati ya Ushauri ya Mkoa (RCC).#Nyang'hwaleInasonga