KAMATI YA FEDHA, UONGOZI NA MIPANGO YARIDHISHWA NA KASI YA UTEKELEZAJI WA MIRADI YA MAENDELEO

Posted on: May 3rd, 2024

Wajumbe wa Kamati ya Fedha Uongozi na Mipango jana Mei 02, 2024 imefanya ziara ya kukagua miradi ya maendeleo na kuridhishwa na kasi ya utekelezaji wa miradi hiyo.

Mwenyekiti wa Kamati hiyo ambae pia ni Diwani wa kata ya Kafita, Mhe. John I. John amesema kuwa sehemu kubwa ya miradi hiyo inatekelezwa kwa kasi inayoridhisha licha ya changamoto chache zinazojitokeza.

Aidha ameongeza kuwa ni muhimu kuhakikisha miradi hiyo inakamilika kwa wakati ili ianze kutumika kwa kutoa huduma zilizokusudiwa kwa Wananchi.

“Tumeletewa fedha nyingi na Serikali kwa ajili ya kutekeleza miradi hii, hivyo sisi kama kamati tuna jukumu la kusimamia na kuhakikisha fedha hizo zinatumika vizuri na thamani yake ionekane kupitia miradi hii” Amesisitiza Mhe. John

Miongoni mwa miradi ambayo ilipata fursa ya kutembelewa ni pamoja na ujenzi wa jengo la wagonjwa wa nje (OPD) katika kituo cha Afya Nyang’hwale wenye thamani ya Tsh. Milioni 160.7, ambapo kukamilika kwake kutapunguza umbali wa kufata huduma za Afya kwa wakazi wa maeneo hayo.

Wajumbe wa kamati hiyo pia walitembelea mradi wa Ukamilishaji wa kituo cha Uwezeshaji Wananchi Kiuchumi wenye thamani Tsh. Milioni 247.1 ambapo ujenzi ujenzi wake umefikia asilimia 85.

Kituo hiko kitakapokamilika kinatarajiwa kuwa na faida za moja kwa moja Wananchi ambapo faida hizo zitatokana na uwepo wa Taasisi mbalimbali za Serikali na binafsi zitakazorahisisha upatikanaji wa huduma mbalimbali kwa jamii.

Miradi mingine ni ujenzi wa  matundu saba ya vyoo, Ofisi, na kichomea taka katika stendi ya Ikangala wenye thamani ya Tsh. Milioni 62.3, Ujenzi wa nyumba ya Mkurugenzi wenye thamani ya Tsh. Milioni 150 na mradi wa kikundi cha vijana cha uchakataji wa nafaka uliopo Kijiji cha Nyakaswi.

Ziara hiyo itaendelea leo Mei 03, 2024