JAMII IWAJIBIKE KUMLINDA MTOTO WA KIKE

Posted on: October 12th, 2023

Maadhimisho ya “Siku ya Mtoto wa Kike” kwa Wilaya ya Nyang’hwale yamefanyika kikamilifu jana Oktoba 11, 2023 katika viunga vya Shule ya Sekondari Izunya iliyopo Kata ya Izunya.

Maadhimisho haya ni utekelezaji wa tamko la Baraza kuu la Umoja wa Mataifa liloketi Disemba 19, 2011 ambalo lilielekeza Nchi wanachama wa umoja huo kuadhimisha Siku ya Kimataifa ya Mtoto wa Kike.

Madhumuni ya maadhimisho haya ni kuthamini jitihada mbalimbali zinazochukuliwa na Nchi wanachama wa umoja wa Mataifa katika kuboresha upatikanaji wa haki, ulinzi, na ustawi wa maendeleo ya mtoto wa kike.

Afisa Ustawi wa jamii, Ndugu, Octavianus Rweyendera, amesema kuwa Jamii inapaswa kuhakikisha mtoto wa kike anapata haki zake za msingi. Haki hizo ni pamoja na haki ya kuishi, kupata elimu, kushirikishwa, kulindwa na kuendelezwa.

Afisa elimu sekondari, Linus Samson amesema Serikali kupitia Wizara ya Elimu na TAMISEMI inaendelea kufanya juhudi za kuweka mazingira mazuri kwa mtoto wa kike kuweza kupata elimu bora.

“TAMISEMI na Wizara ya Elimu wameleta Mpango wa Shule salama shuleni, Serikali imetenga fedha kwa ajili ya mpango wa shule salama ambapo kwa idara ya sekondari tunaita fedha za SEQUIP” Amesema Ndugu Linus

“Lengo la mpango huu ni kupunguza umbali mrefu kwa mwanafunzi kutoka nyumbani kuifikia shule ilipo. Mpango huu tumeanza kutekeleza mwaka jana kwa kujenga Shule ya Sekondari Nyamtukuza ambayo imesaidia kupunga umbali mrefu kwa Wanafunzi” Ameongeza Ndugu Linus.

Diwani wa Viti Maalum, Kata ya Izunya, ambaye pia ndiye mgeni rasmi wa halfa hiyo, Mhe. Salome Gwanchele amewaasa Wanafunzi wa kike kuwasikiliza wazazi na walezi wao kwa ustawi mzuri wa maisha yao ya sasa na baadae.

Maadhimisho ya siku ya mtoto wa kike duniani hufanyika kila mwaka ifikapo Septemba 11, 2023. Maadhimisho ya mwaka huu 2023 yamebebwa na kauli mbiu isemayo “Haki Zetu ni Hatma Yetu Wakati ni Sasa”