HONGERENI NYANG’HWALE KWA KUJENGA MSINGI IMARA WA KUPATA HATI SAFI - MKUU WA MKOA WA GEITA, MHE. MARTINE SHIGELA

Posted on: June 26th, 2024

Mkuu wa Mkoa wa Geita Mhe. Martine Shigela ameipongeza Halmashauri ya Wilaya ya Nyang’hwale kwa kujenga msingi imara wa kuhakikisha wanapata hati safi kila mwaka kutoka kwa Mdhibiti na Mkaguzi Mkuu wa hesabu za Serikali (CAG)

Amesema hayo jana Juni 25, 2024 kwenye Mkutano maalum wa Baraza la madiwani wa kujadili hoja za Mdhibiti na Mkaguzi Mkuu wa hesabu za Serikali (CAG) uliofanyika katika ukumbi wa mikutano uliopo Jengo la utawala la  Halmashauri.

“Hongereni sana kwa mafanikio haya na ni matumaini yangu kuwa mafanikio haya hayatarudi nyuma. Muendelee kuboresha kwa kupunguza hoja kwa sababu swala la hati safi mmejenga msingi na msingi huo ni pamoja na kupunguza hoja za ukaguzi” Mhe. Martine Shigela.

Mhe. Shigela ameelekeza pongezi zake pia kwa Halmashauri kwa kuendelea kufikia malengo ya kukusanya mapato kwa asilimia zaidi ya mia moja.

“Mwaka jana mlikusanya zaidi ya asilimia mia moja na mwaka huu kabla hamjafunga mwaka mmekua na zaidi ya asilimia mia moja. Maana yake Halmashauri yenu inakusanya vyema mapato na Watumishi wenu wanajipanga kusimamia vizuri hayo mapato” Ameongeza Mhe. Shigela.

Halmashauri ya Wilaya ya Nyang’hwale imefanikiwa kupokea hati safi kwa miaka minne mfululizo kutokana na taarifa ya Mdhibiti na Mkaguzi Mkuu wa hesabu za Serikali (CAG) inayoishia Juni 2023.