HALMASHAURI YA WILAYA YA NYANG’HWALE YAFANYA TATHMINI YA UCHAGUZI WA SERIKALI ZA MITAA ULIOFANYIKA NOVEMBA 27, 2024.

Posted on: December 13th, 2024

Kwa niaba ya Msimamizi wa Uchaguzi wa Halmashauri ya Wilaya ya Nyang’hwale, Afisa Uchaguzi wa Wilaya Ndg. Dickson Msumari leo Desemba 13, 2024 amewasilisha taarifa ya Uchaguzi wa Serikali za Mitaa 2024 katika Kikao cha tathmini kilichofanyika kwenye ukumbi wa mikutano wa Halmashauri.

Tathmini ya Uchaguzi wa Serikali za Mitaa 2024 Wilaya ya Nyang’hwale ilifanyika na Wasimamizi Wasaidizi ngazi ya Halmashauri, Kata na Vijiji.

Akiwa katika kikao cha tathmini hiko Afisa Uchaguzi aliwasilisha taarifa ya uhamasishaji na elimu ya uandikishaji na kupiga Kura ambapo amesema uhamasishaji ulifanikiwa kwa kiasi kikubwa kwa kufika kila Kitongoji na Kijiji kwa njia ya mikusanyiko, matangazo ya Magari na kushirikisha madhehebu ya Dini ambapo ilisaidia kuwa na muitikio mkubwa wa Wananchi kujiandikishaji na kupiga Kura.

Aidha Halmashauri ya Wilaya ya Nyang’hwale inatoa Shukrani za dhati kwa Mhe, Rais, Dkt. Samia Suluhu Hassan kwa kuipatia Halmashauri Fedha Tsh Billion 1.01 kwa ajili ya kununua Vifaa na Fedha za kuendeshea shughuli za Uchaguzi wa Serikali za Mitaa 2024 hadi kukamilika.

Uchaguzi wa Serikali za Mitaa 2024 ulifanyika Novemba 27, 2024 katika Kata 15, Vijiji 62 na Vitongoji 273 ambapo idadi ya Wapiga Kura waliojiandikisha ni 104,335 na walio piga Kura ni 72,035 sawa na asilimia 62 ya Wananchi waliojiandikisha kupiga Kura.

Akiendelea kuwasilisha taarifa hiyo Afisa Uchaguzi alitoa taarifa ya matokeo ya Uchaguzi wa Serikali za Mitaa na  jumla ya Vyama vilivyoshiriki vinne ambavyo ni CCM, CHADEMA, CUF na NCCR-MAGEUZI ambapo CCM ilifanikiwa kushinda jumla ya Vijiji 60 na Vitongoji 270, CHADEMA ikishinda  Vijiji viwili (2) na Vitongoji vitatu (3) huku CUF na NCCR-MAGEUZI havikufanikiwa kushinda Kijiji wala Kitongoji chochote.

Pamoja na mambo mengine Halmashauri inatoa shukrani kwa ushirikiano kutoka Kamati ya Usalama ya Wilaya na Mkoa katika kufanikisha zoezi la Uchaguzi. Vilevile shukrani ziende kwa Watumishi wote wa Serikali, Mgambo pamoja na Wadau wote wakiwemo Vyama vya Siasa, Viongozi wa Dini na Wazee Maarufu.

Halmashauri inawatakia kheri Viongozi wote katika kutekeleza majukumu ya kuwahudumia Wananchi wa Nyang’hwale.