ELIMU YA AFYA YA MACHO YAENDELEA KUTOLEWA MASHULENI KUELEKEA SIKU YA MACHO DUNIANI

Posted on: October 8th, 2025

Kuelekea kilele cha Maadhimisho ya siku ya Macho Duaniani Oktoba 9, Halmashauri ya wilaya ya Nyang'hwale kupitia Idara ya Afya, Ustawi wa Jamii na Huduma za Lishe imetoa Elimu ya Afya ya macho kwenye taasisi za Umma, binafsi na Wananchi kwa ujumla.

Elimu hiyo imetolewa Jana Oktoba 7, 2025, katika Shule ya Msingi Kayenze, Shule ya Msingi Kitongo, Shule ya Sekondari Nyugwa, Benki ya CRDB, NMB na Kituo cha Uwezeshaji Wananchi Kiuchumi.

Elimu hiyo imetolewa na Madaktari kutoka Hospitali ya Wilaya ikiongozwa na Mratibu wa afya ya macho Wilaya Dkt, Athuman Masanja.

Akizungumza wakati wa utoaji wa Elimu ya Afya ya macho, Dkt. Athuman amesema lengo la Maadhimisho hayo ni kutoa Elimu na Huduma za uchunguzi wa macho kwa Wanafunzi na Wananchi kwa ujumla, ili kubaini mapema changamoto za uoni na kuzitafutia tiba stahiki.

Dkt, Athuman amesema katika uchunguzi wa awali wamebaini idadi kubwa ya watu wamekuwa na matatizo ya macho yanayosababishwa na Bakteria na utumiaji wa dawa pasipo maelekezo ya Daktari.

Kwa upande wake, Mfamasia  Joshua Mafuru, amewataka Wanafunzi wasitumie dawa za macho bila kupata vipimo Kutoka kwa Daktari anaehusika na macho kwa kuwa utumiaji holela wa dawa unaathiri mac

Sambamba na hayo Ndg, Mafuru  amesema tatizo la upungufu wa vitamini "A" ni miongoni mwa changamoto zinazoweza kuzuilika kwa kula vyakula vyenye virutubisho muhimu, hasa mboga za majani na matunda kama vile karoti na parachichi.

Aidha, Dkt. Eliana Timu, mmoja wa Wataalamu wa afya walioshiriki katika utoaji wa Elimu ya macho, amesisitiza umuhimu wa Wanafunzi kuwahamasisha Wazazi kuwa na desturi ya kupima Afya ya macho ambapo huduma hiyo inapatikana Hospitali ya Wilaya ya Nyang'hwale.

Maadhimisho ya mwaka 2025 yanaambatana na kauli mbiu isemayo “Penda Macho Yako, Kila Mtu Anahusika”, ambapo inaihimiza jamii kujali afya ya macho kama sehemu muhimu ya ustawi wa maisha na maendeleo.